La Sociedá de Promoción Esterior Principáu d’Asturies (Asturex) entama mañana y pasáu les xornaes Open Days pa sofitar a les empreses asturianes interesaes n’empecipiar o ampliar la so presencia en mercaos internacionales.
El presidente Adrián Barbón va inaugurar los alcuentros mañana pela mañana, nun actu nel que tamién van intervenir la presidenta de la Federación Asturiana d’Empresarios (Fade), María Calvo, y el conseyeru d’Industria, Empléu y Promoción Económica y presidente d’Asturex, Enrique Fernández.
Per primer vegada, l’eventu ábrese a tolos actores implicaos na esportación, independientemente de les sos funciones. Asina, van participar compañíes que planteguen empezase a esportar y otres qu’escuerren consolidar les sos vientes internacionales o sondiar nuevos mercaos en canales dixitales o tradicionales. Igualmente, van tomar parte profesionales de comerciu esterior que trabayen n’empreses o consultoríes y moces qu’estudien carreres de comerciu y marketing. Ta prevista l’asistencia de más de 200 compañíes.
Tamién van intervenir ponentes que van esponer les sos esperiencies sobre mercaos internacionales y estratexes o ferramientes pa esportar. Coles mesmes, van facilitase los contactos ente distintos axentes y van desenvolvese meses sectoriales sobre retos y oportunidaes.
L’oxetivu de Asturex ye que les empreses, especialmente les esportadores, conozan y ardíciense del ampliu abanicu de servicios a la so disposición p’aportar o consolidase en nuevos mercaos.
La inscripción ye gratuita pa les empreses y la sociedá de promoción pon a la so disposición la conocencia de les sos 32 collaboradores, que cubren un total de 50 mercaos internacionales.
Los alcuentros van tener un formatu dinámico y participativo, van aguiyar la comunicación axusto a negociu (B2B) y van conectar a les empreses asturianes colos mercaos internacionales. Los asistentes van poder percorrer un itinerariu d’esportación en seis pasos afechu a cualquier tipu d’organización, seya como quier el so tamañu o la so fase de internacionalización. Pal so desenvolvimientu, van conocer tolos servicios a la so disposición y tamién les ayudes económiques que se convoquen.
Amás, van poder asesorase con espertos n’estratexa comercial, comerciu lletrónicu, marketing dixital, loxística, fiscalidá, protección intelectual, contratación internacional y llicitaciones internacionales.
Les compañíes comenenciudes van poder solicitar un itinerariu personalizáu pa llograr oxetivos y cubrir les sos necesidaes sofitándose nos servicios de Asturex. Tol equipu d’esti órganu va tar presente pa ufiertar asesoramientu.
De forma paralela a les actividaes, mañana van analizase les claves y ferramientes pa impulsar y favorecer la esportación na área Speakers’ corner. Nesti ámbitu, van dar a conocer les ayudes del Idepa, los servicios del Icex y de los puertos d’Avilés y Xixón, cómo ten de ser la preparación p’allegar a feries internacionales y les plataformes dixitales p’aportar a nuevos mercáu.
El programa de AsturexOpenDays va siguir el xueves, día 2, cola conferencia La fuerza de lo colectivo, de Juanma Iturriaga, subcampeón olímpicu de baloncestu y espertu n’equipos d’élite y alta competición. Tamién se va celebrar la mesa redonda Collaborando pal ésitu, na que se van presentar casos d’ésitu de cooperación pa la esportación. Tamién va haber un espaciu pal diálogu enfocáu a los sectores del metal, la construcción, los alimentos y bébores, les TIC y empreses de base tecnolóxica, la salú y la moda.
