Xixón al día

Etiqueta: Bachilleratu

  • Educación adelanta a xunu la evaluación estraordinaria de Primeru de Bachilleratu

    Educación adelanta a xunu la evaluación estraordinaria de Primeru de Bachilleratu

    La Conseyería d’Educación comunicó güei la decisión d’adelantrar de setiembre a xunu la evaluación estraordinaria de 1º de Bachilleratu dende este mesmu cursu. Los exames tendrán de realizase, al menos, quince díes dempués de la prueba ordinaria y la fecha llende va ser el vienres 23 de xunu de 2023. D’esta manera, la última selmana del mes va quedar disponible pa resolver posibles reclamaciones.

    La conseyera Lydia Espina informó sobre esta midida na xunta que caltuvo col Comité de Direcciones de Secundaria, que foi precisamente l’órganu que propunxo la so aplicación. Amás, unvióse un boletín a los centros docentes pa comunica-yos la decisión y pa que incluyan el cambéu na Programación Xeneral Añal (PGA), que’l so plazu de presentación amplióse hasta’l 15 de payares.

    Educación sofitó la propuesta yá que considera que ye positiva dende’l puntu de vista pedagóxicu y que favorez la igualdá d’oportunidaes ente l’alumnáu. Coles mesmes, entiende que va ameyorar la organización interna de los centros, tanto nel entamu como nel final de cursu.

    Pela so parte, l’alumnáu tendrá de respetar el periodu lectivu establecíu nel calendariu escolar, independientemente de que tenga que realizar o non la prueba estraordinaria.

    Esti cambéu de fecha va dexar tamién unificar el calendariu de les etapes non universitaries. Asina, col treslláu a xunu de la prueba estraordinaria de 1º de Bachilleratu complétase la supresión de los exames de setiembre n’Asturies. El cursu pasáu esaniciáronse los de Secundaria, tres la entrada a valir del Real Decreto 984/2021, de 16 de payares. Primeramente yá s’afixera la evaluación estraordinaria de 2º de Bachilleratu a la prueba d’accesu a la Universidá (EBAU), que se celebra nos meses de xunu y xunetu.

  • Educación va ampliar les hores de llingua asturiana tres reunise con Iniciativa pol Asturianu y l’ALLA

    Educación va ampliar les hores de llingua asturiana tres reunise con Iniciativa pol Asturianu y l’ALLA

    Educación va ampliar les hores de llingua asturiana nel bachilleratu tres caltener una xunta con Inaciu Galán y Xuan Pandiella, representantes d’Iniciativa pol asturianu y col presidente de l’Academia de la Llingua Asturiana, Xosé Antón González Riaño. La conseyera calificó de «positivu» el balance de dambos alcuentros, nos que «espliquemos los nuesos proyectos y tamién los marxes llegales nos que movemos”. Tamién recordó que nestos momentos tán faciéndose los currículos de toles etapes a la LOMLOE y qu’una de les premises que se tresmitió a los grupos de trabayu ye «tratar l’asturianu, la cultura, la llingua y la tradición de forma tresversal». La conseyera añedió que quier afondase nel acercamientu n’edaes tempranes a les llingües, y concretamente a la cultura asturiana», lo qu’implica’l refuerzu na etapa d’Infantil. Per otra parte, adelantró que se va amontar en Bachilleratu la carga horaria de l’asignatura d’asturianu, qu’anguaño ye d’una hora.

    En materia de personal, encetó la creación de la especialidá docente d’asturianu. “Ye un tema que nos esmolez enforma porque afecta a les condiciones de más de 250 interinos ya interines, compañeros que nun pueden aportar a una oposición, nun pueden tener un puestu fixu nin pueden participar nel concursu de tresllaos. Pa nós ye importantes da-yos estabilidá, pero siempres topetamos cola negativa del ministeriu”, esplicó. Sicasí, tamién-yos adelantró qu’espera tener llueu una xunta cola ministra, Pilar Alegría, pa “poder concretar a nivel políticu por qué ye tan importante para nós que se reconoza la especialidá docente”.

    Al respective de les oposiciones, la conseyera indicó que se ta trabayando por que en el próximu procesu selectivu de Secundaria, les certificaciones de B2 y C1 d’asturianu puedan homologase como creitos de formación del profesoráu. Coles mesmes, tamién adelantró güei que se ta peracabando l’actualización de la toponimia del sistema de gestión Sauce, de la Conseyería d’Educación, y qu’espera que tea llistu pal próximu mes de setiembre.