RPA va estrenar un espaciu nuevu el martes 1 de marzu, a les 23 hores, el programa d’entrevistes documentales Asturies 81:21, la hora de l’autonomía. L’espaciu, presentáu pol periodista Inaciu Galán, busca conocenos meyor como pueblu, facer balance de cuarenta años y mirar hacia’l futuru de l’autonomía asturiana.
A lo llargo de los 24 capítulos del espaciu va facese un percorríu pel nacimientu y la hestoria de l’autonomía asturiana, colos sos protagonistes y los momentos clave de cuarenta años que tresformaron Asturies. L’espaciu va falar de los momentos más importantes, pasando pela preautonomía, la redacción y aprobación del Estatutu, l’asunción de competencies nueves, la puesta en marcha de servicios, el papel de los diferentes presidentes, les crisis económiques y polítiques, etc. col testimoniu y l’analís de los sos protagonistes nel ámbitu de los movimientos sociales, culturales o sindicales.
El primer capítulu va percorrer los antecedentes de l’autonomía con una entrevista col hestoriador Faustino Zapico, siguiendo darréu’l so pasu pel programa figures clave nes primeres décades d’autonomía, tales como Pedro de Silva, Antonio Trevín, María Victoria Escudero, Amelia Varcárcel, Antonio Masip o Xuan Xosé Sánchez Vicente, ente otros.
Nel equipu del programa tán, embaxo la dirección d’Inaciu Galán, la hestoriadora Arantxa Margolles y l’investigador David Fernández, como guionistes, la propia Margolles y l’actor Sergio Buelga nes llocuciones, Víctor Suárez na corrección llingüística, Lluis Fanjul y Marcos SL na técnica y Jennifer Berrocal na producción.
Inaciu Galán (Xixón, 1986) ye periodista, escritor ya investigador, con obres como “¡Volved las manos al bable! La llingua asturiana nel Franquismu”, trabayu col que se doctoró. Presentador de programes como Mundu Sidreru en TPA o Sentir Asturies, en RPA, ye director de proyectos como la plataforma PlayPresta, la revista Viaxast o los documentales Elles, muyeres na lliteratura asturiana o No se dice «ye», se dice «es», o Xeneración Formientu, ente otros.
