Xixón al día

Etiqueta: lliteratura

  • Asturies promociona la lliteratura asturiana nel Reinu Uníu

    Asturies promociona la lliteratura asturiana nel Reinu Uníu

    El Gobiernu d’Asturies, al traviés de la Dirección Xeneral de Política Llingüística, collabora col proyectu académicu Changing the Translation Landscape from Multilingual Spain: Cultural Diplomacy and the UK Publishing Industry (Cambiar el paisaxe de la traducción de la España multillingüe: diplomacia cultural y la industria editorial británica), dirixíu pola profesora Olga Castro, de la Universidá de Warwick (Reinu Uníu), que busca estudiar y promocionar la traducción de lliteratura dende les distintes llingües d’España dientro del país británicu.

    La collaboración del Principáu fai posible la presencia de la lliteratura en llingua asturiana nuna mesa redonda que va facese’l xueves 20 d’abril na Feria del Llibru de Londres col títulu «Less Translated Literatures from Spain: Asturian, Basque, Galician» (Lliteratures españoles menos traducíes: asturianu, vascu, gallegu). Esti actu va cuntar cola intervención del autor y traductor gallegu Xesús Fraga, de la editora Susie Wilde, editora del sellu galés Parthian Books, y de Robin Munby, traductor lliterariu británicu afincáu n’España, autor de traducciones inédites asturianu-inglés.

    Al otru día, vienres 21 d’abril, va haber nel Institutu Cervantes de Londres l’actu Riveting Writing from Multilingual Spain. Translators from Asturian, Basque, Catalan, Galician and Spanish (Lliteratura apasionante de la España multillingüe. Traductores del asturianu, vascu, catalán, gallegu y español), una sesión que va incluyir la presentación de la revista The Riveter, publicada pol organismu European Literature Network. El númberu que se presenta incluye traducciones al inglés de testos asturianos d’autores como Pablo Texón y Claudia Elena Menéndez, amás d’un artículu de Robin Munby qu’ufierta la so perspectiva sobre la traducción ente estos idiomes.

    El propósitu de que la lliteratura asturiana tea presente nestos actos ye ayudar a la difusión de la nuestra lliteratura más actual fuera de les nuestres fronteres, amás d’intentar despertar l’interés de les editoriales britániques por obres escrites en llingua asturiana.

  • Yá ta en llibreríes la quinta edición de ‘Güeli’, el llibru qu’homenaxea a les güeles asturianes

    Yá ta en llibreríes la quinta edición de ‘Güeli’, el llibru qu’homenaxea a les güeles asturianes

    Con más de 2.000 exemplares vendíos en dos años y mediu, ‘Güeli. Histories d’amor y remangu’ ye un llibru que ta algamando’l so oxetivu: homenaxear la historia de les güeles asturianes, eses heroínes anónimes que criaron, educaron y llucharon por dexanos un futuru meyor. La obra recueye 35 histories de güeles escrites poles sos nietes y nietos y la so quinta edición yá llegó a les llibreríes con una novedá; inclúi unes páxines finales en blanco pa que quien tenga’l llibru puea escribir la historia de so propia güela y apegar una semeya d’ella.

    Too entamó con un post nel Instagram de la marca de ropa Puru Remangu en marzu de 2020: “La historia de les nuestres güeles, tamién ye parte nuestra. Nun dexemos que s’escaezan les sos vivencies, les aventures, les penuries d’una guerra. Fala con to güela, escribi la so historia”. La idea enllenó esta rede social coles esperiencies d’Olvido, Saluda, Esther, Ángeles, Marina, Julia y otres tantes muyeres anónimes qu’hasta agora nun recibieron nengún homenaxe públicu, pese a ser una parte imprescindible de la nuestra historia.

    L’éxitu d’esta iniciativa y el componente emocional y históricu merecía qu’estos testos nun quedaren namás n’Instagram y por eso Puru Remangu -col permisu de caúna de les y los autores-, decidió compilar les 35 narraciones nel llibru ‘Güeli. Histories d’amor y remangu’. A lo llargo les sos 96 páxines puen lleese vivencies como les de deprender a montar en bici, viaxar a Venecia, emigrar a Francia, trabayar de carbonera o nuna fábrica de conserves, montar un cine na cuenca del Nalón… Histories escrites dende’l cariñu, que representen a toa una xeneración y que gracies a esti llibru tán quedando pa la posteridá.

  • La FACC convoca’l segundu concursu de rellatos d’obres n’asturianu pa mayores de 65 años

    La FACC convoca’l segundu concursu de rellatos d’obres n’asturianu pa mayores de 65 años

    La Federación Asturiana de Conceyos (FACC) convocó’l segundu concursu de rellatos de ficción o autobiográficos pa persones mayores de 65 años residentes nel Principáu. Con esta nueva convocatoria quier dase continuidá a la escelente participación rexistrada na so edición 2022, a la qu’allegaron 50 obres. Esti premiu enmárcase nel proyectu ‘No me llames soledad’, que tien como finalidá favorecer l’avieyamientu activu y que cunta cola collaboración de la Conseyería de Salú.

    La convocatoria contempla la posibilidá de presentar obres tanto en versión texto como audiu o vídeu pa facilitar la participación de quienes nun usen ordenador. L’únicu requisitu argumental de los rellatos ye que tienen d’incluyir una referencia a xuegos de la infancia. El plazu de presentación de les obres remata’l 24 de febreru de 2023, a les 23:59 hores, pudiendo unviase per corréu postal y electrónicu o por WhatsApp.

    El concursu va ser resueltu por un xuráu compuestu por profesionales del ámbitu lliterariu y por especialistes sobre avieyamientu y salú, amás de pol ganador de la primer edición, Xuan Miyar.

    El relatu ganador va tener un premiu valoráu en 500 €. Coles mesmes, establécense trés menciones especiales pa obres n’asturianu o eonaviego, p’aquelles procedentes de centros residenciales y pa les presentaes al traviés de programes municipales. Caúna d’estes menciones va recibir un premiu por valor de 250 euros.

  • Asturies, Cultura en rede entama un avientu lliterariu

    Asturies, Cultura en rede entama un avientu lliterariu

    El circuitu de lliteratura d’Asturies, Cultura en Rede intensifica l’actividá’l mes d’avientu con propuestes per tol Principáu.

    Esta selmana va haber cuntacuentos Bambalinas y bambaleos de Teatro del Cuervo en Tapia’l día 8 y narración oral y títeres en ¡A medias! de Tras la Puerta Títeres en Ḷḷena’l día 9. Movusic va enseñar la maxa de los llibros n’Érase una vez… una ilusión en Cangas del Narcea’l día 27, en Colunga’l 28 y en Grau’l 29 d’esti mes.

    En Grau VA de Verde&Azul va narrar cuentos populares de la tradición oral en Vuela cuento’l 12 d’avientu y Asturlibros Gloobal va impartir el taller d’ilustración infantil Pint-A’l día 14. El 16 d’avientu Teatro Plus va tar Amasando personajes en Candamu, Mar Rojo Teatro va cuntar Cuentos, patas, picos y pezuñas en Ḷḷena, David Acera va llevar La hora del globo en Navia y va haber Cuentos de Navidad d’Elisabet Martín Teatro en Ribeseya, una propuesta de narración oral que’l públicu de Samartín d’Ozcos va poder disfrutar el día 22 y lo de Candamu, el día 23.

    VA de Verde&Azul tamién va tar con Cómo me convertí en verde’l día 20 en La Ribera, Gloria Sagasti colos sos Cuentos encerrados el día 20 en Llanera y David Acera con Cuentos de colores para días en blanco y negro’l día 20 en Navia y el 29 d’avientu en Ḷḷena. Les histories enllenes de maxa y fantasía de La Sonrisa del Lagarto van llegar el 21 d’avientu a Cangas del Narcea; los Cuentos de Birlibirloque de Yheppa Títeres, el día 26 a Tinéu; y el 29 d’avientu, La vuelta al mundo en ochenta días de Fantastique Company a Colunga y Puppys, a Cuaña.

    La programación d’anguaño va acabar el día 30 con De brujas y otros cuentos de Gloria Sagasti en Nava y Cartas a Lorca de Luz de Gas Teatro en Gozón.

  • Poemes pal 25P, la propuesta de Pravia

    Poemes pal 25P, la propuesta de Pravia

    L’Ayuntamientu de Pravia anunció que, con motivu del 25 de payares, Día internacional de la elminicación de la violencia contra la muyer, el auditoriu José Barrera va acoyer un recital de poesía contra la violencia machista.

    L’actu, que va entamar a les 20:00 hores, va tar conducíu por Alma Hidalgo y van participar autores como Yedra Riesgo, Sara Areces, Natalia Campo, o Mª Esther García López, presidenta de l’Asociación d’Escritores d’Asturies.

  • Pravia acueye les XXII Xornaes Lliteraries, enfotaes na lliteratura xaponesa

    Pravia acueye les XXII Xornaes Lliteraries, enfotaes na lliteratura xaponesa

    Pravia acueye mientres esti fin de selmana les XXII Xornaes Lliteraries, entamaes pola asociación d’escritores d’Asturies. Una nueva edición que va tratar sobre la lliteratura xaponesa y que llevan el nome de «Ikebana lliterariu».

    Van tener presencia ponentes espertos nesta lliteratura como Minako Takahshi de la Universidá de Santiago, Raúl Fortes de la Universitat de València, Carlos Rubio de la Llave de la Universidá Complutense de Madrid y otros espertos orientalistes como Enrique Llinares,(Alicante) director de la Gaceta del haiku » Holas na cera» y Fernando Cid de la Universidá de Guglielmo Marconi de Roma (Italia); escritores con obra publicada de haikus como Aurelio González Ovies, Esther García López, Carmen Nozal, Ánxel Álvarez Llano y Francisco Velasco. L’antropólogu Roberto González Quevedo va facer una comparanza ente los cuentos tradicionales asturianos y los xaponeses.

    Tamién van tener presencia les editoriales de temes de Xapón que tienen el so allugamientu n’Asturies como Satori y Milky Way y empreses rellacionaes col mundu de l’animación (anime) como The Angry Metal Company ya ilustradores como Borja Saura y Angye Fernández. Primeramente los díes 8 y 26 d’ochobre, celebráronse talleres de haikus nos Centros Educativos de Pravia que van tener participación nes Xornaes con una puesta de mancomún de los sos trabayos el vienres día 18 a les 12:00 na Casa de Cultura de Pravia.

    El vienres día 18, va tener llugar un conciertu de koto al cargu de la profesional xaponesa Yoshie Sakay, nel entemediu va haber un recital de haikus al cargu d’una representación d’escolinos de los colexos de Pravia. L’Asociación cultural Nikau Dan allugada en Xixón, va proxectar el vienres a les 19:20 unos curtios de temes xaponeses. El sábadu tamién se va celebrar un vermut Lliterariu, n’El Teatrillo, a les 13:30. Va presidir les Xornaes una escultura nomada «Célula blanca» del artista xaponés Tadanori Yamaguchi, afincáu en Pravia. Va Tar ubicada nel patiu del Ayuntamientu de Pravia y podrá vese una esposición de lliteratura xaponesa nel Salón de Plenos del Ayuntamientu onde se van celebrar toles Ponencies. El día 20 va realizase una visita empuesta a Santianes de Molenes de Pravia, a les 11 de la mañana con Salida del Hotel Casona del Busto.

  • Diego Solís asoleya un poemariu nuevu

    Diego Solís asoleya un poemariu nuevu

    L’escritor xixonés Diego Solís ta acabante d’espublizar el so llibru nuevu, Volvemos en 6 minutos, un poemariu editáu por Cuatro Gotes Ediciones y que tuvo una campaña de crowdfunding con dellos productos de merchandising. Estos, son un complementu del llibru diseños por Ines H. y formen un proyectu audiovisual mayor como enxamás se viera n’Asturies

    Al través de tola obra alcontrámonos con una llectura fácil y que viaxa ente la televisión y lo dixital. Como nun podía ser d’otra manera, Volvemos en 6 minutos anicia’l so camín dende la Televisión del Principáu d’Asturies y con daqué tan clásicu de la cadena como una película de vaqueros que viaxa hasta Les Vegues y el so famosu cartel, anque nesti casu fálase de Corvera, non de Nueva York.

    TCM, Netflix, HBO… toda una montonera de plataformes y canales colos qu’esfrutar o fadiar tienen sitiu nesti proyecto a mou de crítica social con películes y series, como La Naranxa Mecánica, Black Mirror (o espeyu negru) o La Llamada, ente otres. Pero non solo eso. Nun mundu dixital onde la televisión va perdiendo fuercia, les apps del móvil garren tamién un papel bien importante na composición de Volvemos en 6 minutos, criticando la casi dependencia y la necesida del so usu por parte de la sociedá en xeneral. Too ello pa rematar… como casi siempres rematen los canales de televisión: con una pausa publicitaria de contino que va de 6 minutos en 6 minutos, anque nesti casu la intención seya volver hasta lo eterno, daqué que casi se pue facer colos códigos QR qu’escuende cada poema del escritor xixonés.

  • Asturies, presente na Feria de Fráncfort

    Asturies, presente na Feria de Fráncfort

    Asturies cunta per primer vegada con un espaciu propiu na Feria de Fráncfort, el principal escaparate européu pal sector editorial. La Conseyería de Cultura, Política Llingüística y Turismu pon a disposición del Gremiu d’Editores Asturianos y de les editoriales de la comunidá un estand que va apurrir a los profesionales del sector un espaciu de negociu onde desenvolver les sos actividaes na feria coles máximes facilidaes.

    Una decena d’editoriales asturianes y el Serviciu de Publicaciones de la Universidá d’Uviéu van tar representaes na feria. L’espaciu d’Asturies va cuntar con obres de distintes editoriales y autores tanto en castellán como en llingua asturiana. Amás, van allegar a Fráncfort dos escritores asturianos: Paco Álvarez y Xuan Bello, gracies al sofitu del Gobiernu d’Asturies y del Ministeriu de Cultura y Deporte, respectivamente.

    España ye’l país convidáu d’honor na edición d’anguaño. D’esta miente, Acción Cultural Española va desenvolver un potente programa lliterariu en formatu híbridu, sol lema #CreatividadDesbordante. Casi 200 participantes ente los que va haber escritores, traductores, ilustradores, editores, axentes lliterarios, llibreros y distribuidores participen nesta feria, na que s’amuesa’l compromisu col sector n’España, la riqueza del plurillingüismu y la diversidá d’autores, xéneros y editoriales del sector.

  • Preséntase la primer edición n’asturianu de la Biografía de Xovellanos

    Preséntase la primer edición n’asturianu de la Biografía de Xovellanos

    El profesor de la Universida d’Uviéu D. Juan Carlos Busto Cortina va presentar la primer edición de la Biografia de Jovellanos de José Miguel Caso González, n’asturianu, cola adautación de testos de M.a Teresa Caso Machicado y tradución de la Oficina de Normalización Llingüística del Conceyu de Xixón. Va facese esti martes 18 d’ochobre na Escuela de Comerciu, dientro del programa Ochobre lliterariu

    El pasáu 10 de setiembre cumplíase’l tercer aniversariu de la muerte del Profesor Caso que foi, de xuru, la máxima autoridá del xovellanismu nos últimos tiempos. La Fundación Foro Jovellanos del Principau d’Asturies, en sintonía colos sos principios d’esparder la vida y la obra del ilustre patriciu xixonés, quier testimoniar otra vuelta l’agradecimientu públicu al llabor realizáu en vida pol Prof. Caso cola espublización d’esta nueva obra.

  • Héroes ensin nome arranca esta nueche en RPA

    Héroes ensin nome arranca esta nueche en RPA

    Héroes ensin nome entama esta nueche nes ondes de la Radio del Principáu d’Asturies a partir de les 23:30 hores. Esti programa, que de manera independiente llanzó en redes sociales una primer temporada con 21 programes y entrevistes a xente como L-R, Misiva o Inaciu Galán, ente otros, vuelve agora al traviés de la radio y con una producción fecha por Cuatro Gotes Producciones.

    La nueva temporada pretende ser una continuación de l’anterior, onde dellos personaxes de la cultura asturiana van pasar pelos sos micros a falar de la so trayectoria, d’Asturies y a pasar un bon ratu con delles preguntes incómodes, pero gracioses. Nel primer episodiu, que s’estrena güei, falen dende Mieres con Ferla Megía, cantautor sierense. Sicasí, les entrevistes a personaxes más relevantes del panorama cultural asturianu tovía tan por llegar. Bandes como Desakato o Algaire y escritores como Diego Solís van tener la oportunidá de sentase a charrar con Yedra Riesgo y Raúl Alonso, presentadores del programa.

    Héroes ensin nome ye un proyectu fechu por xente mozo, col asturianu como llingua vehicular, col oxetivu de promover y d’esparder les propuestes y proyectos culturales que surden n’Asturies al traviés d’entrevistes onde s’analiza y se debate colos propios autores y onde se conversa tanto formal como informalmente. La finalidá del proyectu ye amosar, al públicu xeneral, al traviés d’un alderique curtiu, la bayura cultural qu’hai dientro de la sociedá asturiana en dellos ámbitos, como la música, la lliteratura o la moda, ente otros.