El Gobiernu d’Asturies cunta per primer vegada con un plan qu’apuesta pol patrimoniu industrial mineru como reclamu turísticu prioritariu, al que se va destinar más d’un millón de los fondos europeos Next Generation. Esta cantidá va dexar desenvolver delles actuaciones para promocionar la ufierta y convertila en motor de reactivación de los territorios en procesu de transición xusta.
La conseyera de Cultura, Política Llingüística y Turismu, Berta Piñán, presidió güei la xunta del grupu de trabayu sobro patrimoniu industrial mineru, que s’axuntó nel Muséu de la Minería y la Industria, y na que tamién participaron la viceconseyera de Turismu, Graciela Blanco, y les directores de Cultura y Patrimoniu, y Minería y Enerxía, Pablo León y Belarmina Díaz. Xuntu colos representantes del Principáu, formen parte d’esti órganu la Federación Asturiana de Conceyos (FACC), Hunosa, el sindicatu SOMA-FITAG-UXT, la Universidá d’Uviéu, el Centru de Desenvolvimientu y Cooperación Territorial (Cecodet) y el Colexu d’Arquiteutos.
El plan d’allugamientu del patrimoniu mineru, que per primer vegada establez una fueya de ruta pa la promoción del catálogu asturianu de recursos patrimoniales venceyaos a la esplotación del carbón, el más estensu d’España, foi unu de los asuntos trataos. “La creación d’una marca turística propia va ser la primer actuación. El plan recueye, amás, el diseñu d’una serie de rutes temátiques en distintos puntos de la comunidá que’l so filo conductor van ser espacios venceyaos a la hestoria minera”, señaló Berta Piñán. La conseyera destacó la oportunidá que supon apostar “pola enorme riqueza cultural que representa esti patrimoniu”.
El plan considera que la privilexada redolada natural nel que s’alluga la práctica totalidá del patrimoniu industrial ye un fechu diferencial y una ventaya competitiva. Tamién sorraya la importancia de fomentar el llamáu turismu d’esperiencies, nel que’l visitante interactúa y conoz más de la realidá social qu’arrodia al propiu patrimoniu.
El proyectu preve la creación d’un repositorio audiovisual con pieces promocionales, la ellaboración de nuevos materiales informativos y la puesta en marcha de campañes publicitaries centraes nel turismu industrial. Tamién se valoren acciones con prescriptores especializaos como operadores, prensa especializada o miembros de colectivos ya instituciones venceyaos a la xestión y promoción del patrimoniu industrial.
Tamién se va impulsar la presencia d’Asturies en foros especializaos cola organización d’un foru biañal qu’axunte a espertos na materia. Amás, va fomentase la conexón con instituciones y organizaciones nacionales ya internacionales que trabayen na puesta en valor del patrimoniu industrial. El potencial qu’esti tipu d’espacios puede tener como escenariu de rodaxes ye otra de les opciones.
La protección del pozu Santa Bárbara
Amás de les actuaciones dende’l puntu de vista turísticu, la conseyería tramitó l’ampliación de la declaración de Bien d’Interés Cultural (BIC) del pozu Santa Bárbara de La Rabaldana, en Mieres, cola incorporación del antiguu economatu de la esplotación, construyíu en 1916. Ye l’únicu d’estos establecimientos que se caltien nel valle de Turón.
Pela so parte, la directora xeneral de Minería y Enerxía repasó los proyectos de fondos mineros que se tán realizando n’antigües instalaciones de pozos de carbón. Actuaciones qu’inclúin dende renovación d’instalaciones pa la so habilitar espacios empresariales a la descontaminación de terrenes.
