Xixón al día

Etiqueta: Normalización llingüística

  • Villaviciosa abre un plazu nuevu pa un taller d’asturianu

    Villaviciosa abre un plazu nuevu pa un taller d’asturianu

    El Serviciu de Normalización Llingüística de la Comarca de la Sidra, en collaboración col  Conceyu de Villaviciosa, abre’l plazu pa la inscripción un nuevu Taller d’Asturianu que tendrá llugar nes instalaciones del Atenéu Obreru  los martes de 18:00 a 20:00, dende’l prósimu 7 de febreru hasta’l 31 de mayu.

    El taller ta empobináu a toa persona interesada n’ampliar los sos conocimientos sobre llingua asturiana independientemente del nivel, y atenderá tanto pa la estaya oral y como pa la escrita, onde entrará’l repasu de les principales normes ortográfiques. tratando de aumentar al traviés del coaprendizaxe la competencia individual.La historia de la llingua y la so lliteratura, asina como los aspectos sociollingüísticos, tarán tamién ente los conteníos que se tratarán nel taller.

    El cursu ye gratuitu y d’equí al mesmu 7 de marzu les persones interesaes pueden informase o apuntase  nel corréu normastur@lacomarcadelasidra.com o, n’horariu de mañanes, nel teléfonu de la Mancomunidá Comarca de La Sidra

  • Cangas del Narcea celebra’l Día Internacional de la Ḷḷingua Materna fomentando l’usu del asturianu

    Cangas del Narcea celebra’l Día Internacional de la Ḷḷingua Materna fomentando l’usu del asturianu

    El Serviciu de Normalización Ḷḷingüística de Cangas del Narcea inaugura esta sumana las actividades que van desenvolvese con motivu del Día Internacional de la Ḷḷingua Materna, que se celebra cada 21 de febreiru en tol mundu, tal ya cumo instauróu la UNESCO en 1999. Trátase d’actividades que tán enfocadas al públicu escolar ya quieren dar a conocer la historia de la nuesa ḷḷingua ya fomentar el sou usu ente los más nuevos.

    Esti xueves 17 de febreiru empicipian las actividades no IES de Cangas del Narcea, con una conferencia a cargu del periodista, profesor ya escritor Inaciu Galán, quien vei tresladar al alumnáu información sobre los más de mil anos d’historia del asturianu en 60 minutos. Vei fadelo cona charla ‘Historia de la llingua asturiana en 60 min’, que chega a Cangas del Narcea de la mano de Cuatro Gotes Producciones. Esta conferencia vei ser esti xueves a las 12.30 horas.

    El ḷḷunes 21 de febreiru van presentase las campañas ‘Xugamos pa deprender’ ya ‘Asina los chamamos aiquí’. La primera d’eḷḷas vei dar a conocer al alumnáu de la Escuela Infantil de 0 a 3 anos ‘Los Gigantinos’ los materiales de la fase cuarta d’esta campaña, que pretende tresmitir la nuesa ḷḷingua mediante xuegos. Outramiente, vei presentase nas redes sociales el material nuevu de la campaña ‘Asina los chamamos aiquí’ con vocabulariu del dialectu occidental del asturianu relacionáu cona fauna ya la flora propias. Esta campaña faise por vez segunda ya busca dar a conocer el vocabulariu propiu del occidente ya fomentar l’usu de la nuesa ḷḷingua ente toda la población de la contorna.

    P’acabar las actividades del Día Internacional de la Ḷḷingua Materna, el Serviciu de Normalización Ḷḷingüística de Cangas del Narcea propón una charla pal IES, que vei celebrase’l 15 de marzu, a las 10 horas, a cargu del filólogu, investigador ya profesor Ramón d’Andrés, quien fui Premiu Máximo Fuertes Acevedo d’Ensayu.

  • Política Llingüística, la Rede de Normalización y el Copae presenten un manual de cultivu ecolóxicu n’asturianu y eonaviegu

    Política Llingüística, la Rede de Normalización y el Copae presenten un manual de cultivu ecolóxicu n’asturianu y eonaviegu

    La Dirección Xeneral de Política Llingüística, la Rede de Normalización Llingüística nos Conceyos y el Conseyu de la Producción Agraria Ecolóxica d’Asturies (Copae) ellaboraron la publicación Cultivu del güertu ecolóxicu n’Asturies / Cultivo del horto ecolóxico en Asturias, una guía práctica pal cultivu ecolóxicu editada n’asturianu y eonaviegu.

    L’actu de presentación va facese mañana, a les 13:00 hores, nel CP Jesús Neira cola presencia del director xeneral de Política Llingüística, Antón García, el director técnicu del Copae, Carlos Nuño, y la responsable del Serviciu de Normalización Llingüística de Ḷḷena, Penélope Miranda.

    Cultivu del güertu ecolóxicu n’Asturies / Cultivo del horto ecolóxico en Asturias ye un manual de 24 páxines onde se recueye la información práctica necesaria pa toa persona que quiera cultivar un güertu ecolóxicu. La publicación incluye un calendariu pa semar, rotaciones de cultivos, plantes acompañantes y una ficha completa de caún de los cultivos más comunes y afayadizos pal territoriu asturianu: pataca, cebolla, maíz, calabacín, etc. Amás, cada ficha incluye un refrán asturianu sobre estos cultivos, el clima o sobre los llabores na tierra en xeneral.

    El proyectu nació cola idea de sorrayar la rellación ente les llingües propies d’Asturies y l’autocultivu sostenible d’alimentos, actividá bien enraigonada na cultura asturiana.

    El cuadernu, del que s’editaron 8.000 unidaes n’asturianu y 2.000 en gallego-asturianu o eonaviegu, va repartise nes escueles asturianes adheríes al programa Alimentación saludable y de producción ecolóxica nos comedores escolares d’Asturies, puestu en marcha por trés conseyeríes: Salú, Mediu Rural y Cohesión Territorial y Educación. Esti programa promueve, ente otres coses, el plantíu nos recintos escolares de güertinos ecolóxicos cola participación d’alumnáu y profesoráu.

    Amás, el manual va tar tamién a disposición del públicu xeneral al traviés de los Servicios de Normalización Llingüística qu’operen nos conceyos y mancomunidaes, y en formatu dixital, na páxina de la Dirección Xeneral de Política Llingüística (http://politicallinguistica.asturias.es)

  • Iniciativa pol Asturianu va participar na asamblea d’ELEN en Santiago de Compostela

    Iniciativa pol Asturianu va participar na asamblea d’ELEN en Santiago de Compostela

    Iniciativa pol Asturianu va participar n’asamblea xeneral de la Rede Europea d’Igualdá Llingüística (ELEN, poles sos siegles n’inglés) que se va celebrar esta fin de selmana en Santiago de Compostela. La entidá va reunise con asociaciones de reivindicación llingüística de Galicia, Euskadi, Aragón, Cataluña y Bretaña, ente otros territorios.

    L’axenda d’ELEN va tar repleta d’alderiques, meses y resoluciones sobre los diferentes temes cruciales qu’afeutan a los miembros de la coordinadora. Amás de la controversia sobre la nueva llei audiovisual n’España, va aldericase sobre la campaña de la Irish Language Act y la censura de la Ley Molac en Francia, ente otres cuestiones.

    Un día enantes de l’Asamblea Xeneral, la entidá anfitriona, A Mesa pola Normalización Lingüística, va ofrecer una recepción oficial xunto cola Universidade de Santiago. Ente los ponentes del actu alcuéntrense Antonio López, rector de la Universidade de Santiago de Compostela; Miguel Santalices, presidente del parlamentu de Galicia; María do Pilar García Negro, presidenta de la Federación Gallega de Cultura; María Dolores F. Galiño, Defensora del Pueblu de Galicia; Davyth Hicks, d’ELEN; y Marcos Maceira, presidente d’A Mesa.

    ELEN ye una organización internacional ensin ánimu d’arriquecimientu que trabaya pola promoción y protección de les llingües territoriales europees. Esta coordinadora d’asociaciones de reivindicación llingüística representa a una totalidá de 47 idiomes, con 168 organizaciones miembros de 24 estaos europeos. L’Asamblea Xeneral d’ELEN faise col sofitu y la collaboración d’A Mesa pola Normalización Lingüística, la Universidade de Santiago de Compostela y el Museo do Pobo Galego. La Asamblea Xeneral va facese con munchos delegaos presentes en Santiago de Compostela y otros participando de forma telemática.