Xixón al día

Etiqueta: ociu

  • Asturies impulsa’l Festival Inclusivu pola Diversidá, que se va celebrar n’Avilés del 2 al 4 de marzu

    Asturies impulsa’l Festival Inclusivu pola Diversidá, que se va celebrar n’Avilés del 2 al 4 de marzu

    Asturies impulsa’l Festival Inclusivu pola Diversidá d’Asturies (Fidas), un eventu multidisciplinar d’ámbitu nacional que se va celebrar per primer vegada n’Asturies, concretamente n’Avilés, los díes 2, 3 y 4 de marzu. Esta iniciativa, financiada con fondos europeos Next Generation, persigue facilitar l’accesibilidá universal a los servicios comuñales y ye una de les primeres intervenciones que se realicen al traviés de la Oficina Virtual d’Accesibilidá Universal.

    La conseyera de Derechos Sociales y Bienestar, Melania Álvarez, presentó güei esta iniciativa xuntu cola alcaldesa d’Avilés, Mariví Monteserín; la conceyala de Cultura del conceyu, Yolanda Alonso, y el director xeneral de Servicios Sociales y Mayores, Enrique Rodríguez Nuño. El gobiernu d’Asturies apurre 50.000 euros a esti acontecimientu.

    El Fidas céntrase nes persones con diversidá funcional, que non solo son protagonistes como participantes, sinón tamién como organizadores y coordinadores. Independientemente de les sos capacidaes, van tomar parte nun eventu qu’ufierta actividaes variaes: artístiques, musicales, culturales, mercadinos, desfiles de moda, talleres de radiu y percusión, amás de danza y teatru.

    A xuiciu de la conseyera, esti acontecimientu va sirvir para dar visibilidá a les persones con diversidá funcional y tamién pa fomentar la so plena inclusión, un oxetivu nel que ta enfotáu’l so departamentu. Amás, agradeció la so collaboración al Conceyu d’Avilés, que cedió de manera altruista tolos sos espacios y medios pa qu’el festival seya posible.

    Para entamar el programa cuntóse con un equipu formáu n’accesibilidá universal, persones con discapacidá y especialistes na celebración d’eventos, polo qu’el festival va disponer de los sofitos necesarios pa qu’el mayor númberu de persones posible pueda esfrutar de les actividaes de manera independiente. D’esta miente, va demostrase cómo l’accesibilidá de les redolaes ye necesaria pa garantizar la participación. Coles mesmes, munches de les acciones, conciertos y talleres van ser dirixíos por profesionales con discapacidá.

  • La versión n’asturianu de WORDLE en PlayPresta conviértese nun ésitu viral

    La versión n’asturianu de WORDLE en PlayPresta conviértese nun ésitu viral

    La plataforma de conteníu n’asturianu, PlayPresta, xunto con Cuatro Gotes Producciones y en collaboración Softastur presentó va pocos díes la so nueva propuesta d’ociu, Wordle, tres sacar va poco’l xuegu viral creáu pol New York Times, Caxellu. Trátase d’un xuegu que se fixo viral nel mes de xineru en dellos idiomes, como castellám ya inglés, y qu’anguaño sigue siendo un ésitu nes redes sociales, llugar nel que se pueden compartir los resultaos. Y agora, gracies a PlayPresta, tamién puede xugase n’asturianu. Una simple güeyada a la etiqueta #WordleAsturianu en Twitter amuesa l’importante tráficu que ta xenerando la versión asturiana d’esti xuegu.

    El xuegu n’asturianu, que na so versión inglesa ta acabante merca precisamente el New York Times, súmase a la llista del xuegu n’idiomes presentes nel estáu español; agora mesmo amás de n’asturianu y castellán, tamién se puede xugar en catalán, gallegu, vascu y aragonés. 

    Pa xugar vas tener seis oportunidaes caldía p’aldovinar la pallabra que s’escuende tres el tableru. Ha introducise pallabres de cinco lletres, siempres que tean presentes nel Diccionariu de l’Academia de la Llingua Asturiana (DALLA), entidá que collabora con esta edición, y pueden repitise lletres. Cuando la lletra nun tea na pallabra, el fondu sedrá negru, mientres que si ta en mariellu, la lletra ta, pero non nel llugar correctu. A lo último, si ta en verde, la lletra ta nel llugar correctu.

    El proyectu de Wordle Asturianu súmase al xuegu Caxellu que PlayPresta punxo a disposición del públicu va unes selmanes. El director de la plataforma PlayPresta, Inaciu Galán, esplicó esta nueva llinia de trabayu: “Tamos queriendo ufrir ferramientes nueves d’entretenimientu col asturianu como llingua vehicular a la comunidá asturfalante, especialmente pesando na xente mozo y col envís de da-y espacios nuevos d’usu al asturianu, con xuegos que tán de plena actualidá nel mundu enteru y a los que pue accedese tamién dende la llingua asturiana”. 

    El xuegu yá ta disponible: https://wordleasturianu.playpresta.com/ 

  • El turismu asturianu raspia los cinco millones d’estancies nel 2021 gracies a un aumentu nel segundu semestre hasta niveles prepandemia

    El turismu asturianu raspia los cinco millones d’estancies nel 2021 gracies a un aumentu nel segundu semestre hasta niveles prepandemia

    El sector turísticu asturianu raspió los cinco millones de pernoctaciones nel 2021 gracies a la importante xubida rexistrada nes nueches d’estancia nel segundu semestre del añu, con una crecedera del 7,2 % al respective del mesmu periodu del 2019 y del 41,5 % en comparanza col 2020.

    Los datos divulgaos güei pol Institutu Nacional d’Estadística (INE) sobre agospiamientos estrahoteleros d’avientu, que cierren la estadística anual, reflexen qu’Asturies recibió a 1.800.667 turistes y rexistró 4.963.947 pernoctaciones nel 2021, lo que representa aumentos del 42,4 y 40,5 %, respectivamente, sobre l’exerciciu anterior.

    Estes cifres suponen descensos del 23,6 y del 13,8 % en dambos conceptos al respective del 2019 —últimu añu ensin afecciones de la pandemia—, yá que nun ye pertinente la comparanza cola primer metá del 2020, na que los agospiamientos tuvieron suspendida la so actividá. La comparanza más equilibrada realizaríase considerando’l segundu semestre del 2019 y el del 2021, lo que supondría xubíes nésti últimu periodu del 0,8 % en visitantes y del 7,2 % en pernoctaciones.

    El desglose por segmentos d’agospiamientu ye positivu en toos ellos en comparanza col 2020. Asina, el númberu de viaxeros crez un 49,9 % pa los hoteles, un 23,9 % en campings, un 38,6 % n’apartamentos turísticos y un 27,8 % n’agospiamientos rurales. Pela so parte, les estancies xubieron n’hoteles (51,3 %), campings (26 %), apartamentos turísticos (49,3 %) y nel ámbitu rural (23,6 %).

    Pela so parte, el turismu internacional vuelve manifestar la so recuperación, al crecer un 145,3 % los viaxeros estranxeros y un 127 % les sos pernoctaciones, pa pasar a representar el 10,3 y el 8,6 % del global, frente la so aportación nel 2020, que foi del 6 y del 5,4 %, respectivamente.

    Rexistros d’avientu

    Los datos d’avientu del 2021 superen el récord d’estancies, con un total de 242.293, un 1,7 % más que nel 2019, añu nel que se rexistraron 238.295. Tocantes a los turistes, contabilizáronse 101.421, de cuenta que prácticamente multiplíquense por siete les cifres del 2020.

    En términos d’empléu, avientu cerró con 3.914 persones trabayando nos agospiamientos asturianos, 2.882 percima del mesmu mes del añu anterior.

    “Estos datos manifiesten por que’l procesu de recuperación del sector turísticu ye una realidá y que’l segundu semestre del añu foi escepcional, inclusive percima de niveles prepandemia”, destacó la viceconseyera de Turismu, Graciela Blanco.

    Pa Blanco, anguaño va suponer l’empiezu “de la mayor meyora n’inversión turística en décades”, yá que los fondos europeos Next Generation van implicar un gran impulsu, al movilizar prácticamente 27 millones nel Principáu.

    La viceconseyera reconoció’l trabayu desenvueltu en xunto col sector turísticu asturianu, que consideró “clave” pa encarar la situación xenerada pola pandemia.

  • Caxellu, el xuegu nuevu de Play Presta, ta siendo un ésitu

    Caxellu, el xuegu nuevu de Play Presta, ta siendo un ésitu

    La plataforma de conteníu online n’asturianu PlayPresta ta acabante de llanzar na so web y redes sociales el xuegu nuevu, Caxellu, que desenvolvieron y que yá ta disponible nel siguiente enllaz: https://caxellu.playpresta.com/. La propuesta trátase d’un xuegu nel qu’hai que combinar siete lletres pa formar pallabres y ye una adaptación del popularizáu xuegu del New York Times, Spelling Bee. Nos primeros díes, el númberu de participantes ta siendo un ésitu.

    La iniciativa, que llega agora a Asturies gracies a PlayPresta y Cuatro Gotes Producciones, ye un ésitu n’otros llugares del estáu, como Cataluña, onde’l lleva’l nome de Paraulògic y rexistró cifres que fixeron que los servidores colapsaran en dalgunos momentos. Los datos de participación siguen medrando, y ye que en dalgunos díes de les fiestes de Nadal, el xuegu llegó a cifres d’ente 120.000 y 137.000 persones, lo que dexa bien claro l’ésitu que tuvo y que sigue teniendo. 

    La creación del xuegu na so versión n’asturianu foi trabayu d’un equipu dirixíu por Inaciu Galán, cola xestión dixital a cargu del informáticu Óscar David Colorado Espina y col diseñu gráficu, basáu na idea del xuegu como un caxellu d’abeyes y de l’abeya Olaya como símbolu, pol reputáu ilustrador Enrique Carballeira. Amás, cuntaron cola collaboración de los creadores de la versión catalana del mesmu. L’Academia de la Llingua Asturiana collaboró tamién apurriendo’l corpus del diccionariu normativu de la institución, que ye la base na construcción de pallabres.

    Les normes del xuegu esixen formar pallabres coles lletres del caxellu, siete, pueden repitise y que se renueven cada nueche a les doce, pa dar entamu a un xuegu nuevu. La lletra del caxellu del mediu ye d’usu obligatoriu en toles pallabres que se faigan, qu’han tener un mínimu de trés lletres.

    De los verbos almítense namás los infinitivos (non les formes conxugaes). De los nomes y axetivos almítense les formes masculines, non les formes femenines y neutres, nin los plurales, pel momentu, anque l’equipu ta trabayando p’ameyorar esta opción. Nun s’almiten nomes propios; namás pallabres que tean dientro del Diccionariu de la llingua asturiana de l’Academia de la Llingua Asturiana (DALLA).

    Pa recoyer “la collecha de puntos”, les pallabres de 3 lletres dan 1 puntu, les de 4 lletres, 2 puntos y de magar les 5 lletres, tantos puntos como lletres tenga la palabra. Cada xuegu inclúi lo menos una ‘cortía’ na que s’usen toles lletres y con cada cortía’l xuegu date 10 puntos estra. El términu “cortía” provién del ámbitu de l’apicultura y fai referencia a la cantidá de miel que se saca al capar o cortar un caxellu.

    El xuegu ta disponible de baldre y adáptase perbién al usu dende’l móvil, permitiendo volver sobre’l xuegu a lo llargo del día y facer por consiguir toles pallabres posibles. 

    Pa Inaciu Galán, coordinador de Caxellu: “esta ye una oportunidá d’ufrir un xuegu interesante y formativu a la sociedá, que pensamos que va ser mui bien recibíu ente toles edaes, especialmente na mocedá, amás de ser una ferramienta interesante pal usu nos centros educativos yá qu’unu recuerda y deprende pallabres mientres xuega”.