La Conseyería de Presidencia impulsa seis obres d’emerxencia por un importe de 365.500 euros en cuatro conceyos del oriente: Cangues d’Onís, Onís, Piloña y Ponga, para desaniciar los efectos más urxentes de la envernada d’agua qu’azotó la zona ente finales de payares y principios d’avientu.
El director xeneral d’Alministración Local, Manuel Calvo, visitó güei toles actuaciones, qu’afecten fundamentalmente a deslizamientos en terrenes, llenes de canalizaciones d’agües y daños en viales. La empresa Tragsa ta executando tolos trabayos, sacantes la intervención en Cangues d’Onís.
Los proyectos que se están executando son estos:
Cangues d’Onís
Los daños en Santianes d’Ola afecten a la infraestructura viaria, sobre manera na plaza de la localidá, onde la llena d’un cursu d’agua provocó l’arrastre de gran parte de la esplanada, lo que compromete la so estabilidá. Les canalizaciones de desagüe de la plaza tán quebraes y parcialmente aterraes, polo que cualquier aumentu significativu del caudal pue agravar los daños y poner en riesgu’l tránsitu de vehículos y peatones.
L’actuación que se ta desenvolviendo, por importe de 52.500 euros, consiste na construcción d’una escollera de sostenimientu, la reposición del firme y el pavimentu y l’instalación d’una canalización capaz de soportar más caudal d’agua.
Onís
El Principáu ta reparando l’argayu de la turria del amín a La Robellada. Pa garantizar la seguridá nos desplazamientos, tán construyéndose tres muries de sostenimientos de la turria de 20, 16 y 8 metros de llargor.
Piloña
La intervención consiste en reparar la llena de tierres qu’hubo nel amín d’accesu a Sardea pol frayatu d’una canal que recoyía les agües y l’arrastre de materiales del terremplén escontra’l amín. Pa ello, va construyise una escollera de sostenimientu y va instalase una barrera de protección.
Ponga
Nesti conceyu, unu de los más estropiaos pola envernada, tán realizándose trés intervenciones: dos en San Xuan y una en Taranes.
Na capital del conceyu ta llimpiándose la riega, tán construyéndose arquetes de rexistru y tamién se repón el pavimentu de la plaza afectáu pol frayatu de la canalización y l’arrastre de materiales. Coles mesmes, repárase l’accesu a una vivienda dende la carretera.
Pela so parte, en Taranes ta construyéndose un muriu de sostenimientu de formigón armáu para correxir l’argayu de la turria de la calzada d’accesu.
El Gobiernu d’Asturies alcordó güei solicitar al Conseyu de Ministros que reconoza estos conceyos como como zones afectaes gravemente por una emerxencia de protección civil y adopte midíes urxentes para desaniciar los daños causaos pola envernada ente’l 23 de payares y el 10 d’avientu.
