– La profilaxis va alministrase en puntos habilitaos y en toles árees sanitaries
– Salú Pública encamienta especialmente la segunda dosis d’alcordanza a mayores de 60 años qu’entá nun la recibieren
– Les autoridaes sanitaries aconseyen l’usu de mázcaru a persones vulnerables y a aquelles qu’amuesen síntomes d’infecciones respiratories
El Serviciu de Salú del Principáu (Sespa) programó pa’l vienres una xornada de vacunación frente a la covid ensin cita previa. D’esta miente, van habilitase puntos d’alministración de la profilaxis y horarios en toles árees sanitaries. La directora xeneral de Salú Pública, Lidia Clara Rodríguez, encamienta la segunda dosis d’alcordanza a los mayores de 60 años, por cuenta de la so vulnerabilidá énte’l coronavirus, nun momentu d’aumentu de casos graves nesti grupu de población. El Principáu atópase dende la selmana pasada en nivel de riesgu baxu, con un aumentu de les hospitalizaciones qu’asitia la presión asistencial pola covid nun grau similar al de va seis meses. Les autoridaes sanitaries aconseyen l’usu de mázcaru a les persones vulnerables y a toes aquelles qu’amuesen síntomes d’infecciones respiratories pa evitar les andaes na so redolada familiar, tresporte públicu o llugares multitudinarios. Tamién apelen al so usu n’espacios escasamente ventilaos.
Los espacios y horarios previstos pa la vacunación nes ocho árees sanitaries son los siguientes: – Área sanitaria 1 (Xarrio). Centros de salú d’A Veiga, Navia, L.luarca y Trevías, de 12:00 a 13:00 hores.
– Área sanitaria 2 (Cangas). Centru de salú de Cangas, de 11:00 a 12:00 hores.
– Área sanitaria 3 (Avilés). Centru Comercial Parque Ástur, n’Avilés, de 11:00 a 14:00 hores.
– Área sanitaria 4 (Uviéu). Área d’estracciones del HUCA, n’Uviéu, de 15:30 a 18:00 hores.
– Área sanitaria 5 (Xixón). Tolos centros de salú de la área, de 11:00 a 13:00 hores.
– Área sanitaria 6 (Oriente). Tolos centros de salú de la área, de 11:00 a 13:00 hores.
– Área sanitaria 7 (Caudal): puntu de vacunación del Hospital Vital Álvarez Buylla, de Mieres, allugáu na planta 0. De 12:00 a 14:00 hores. –
– Área sanitaria 8 (Nalón): Centros de salú de Sama y La Felguera, de 12:30 a 13:30 hores.
Salú recuerda que les persones interesaes tienen d’allegar a los puntos habilitaos pa la vacunación col so carné d’identidá. La nueva xornada ensin cita enmárcase na campaña Vacúnate ho/Vacúnate ne pa captar a la población pendiente d’inmunizar. Coles mesmes, el Sespa caltien la vacunación abierta a les persones que la deseyen al traviés de solicitú de cita previa nos sos centros de salú de referencia.
Etiqueta: Sespa
-
El Sespa va celebrar el vienres una xornada de vacunación frente a la covid ensin cita previa
-
El Sespa aumenta un 30% l’actividá quirúrxica n’ochobre
El Serviciu de Salú del Principáu d’Asturies (Sespa) aumentó un 30% l’actividá quirúrxica n’ochobre, con 1.154 intervenciones más qu’en septiembre. D’esta miente, ochobre asítiase como’l tercer mes con meyor actividá d’esti exerciciu y supera la realizada pa esti períodu nos dos últimos años. Esta situación revierte l’enclín del branu, al baxar en 341 el númberu de pacientes en llista d’espera estructural pa una operación, que s’asitia en 23.328.
A pesar de que les indicaciones quirúrxiques siguen aumentando, la demoranza media pa una ciruxía mengua en casi 4 díes y asítiase en 101, per baxo inclusive de la rexistrada en septiembre de 2021. De les 15 especialidaes quirúrxiques, el tiempu amenorgóse en 11. Son especialmente significatives les baxaes en Angiología y Ciruxía Vascular (15 díes menos) y Dermatoloxía (12 díes), y les de ciruxía torácica (9 díes) y ciruxía pediátrica (8 díes).
Tamién se llogró que baxe nun millar el númberu de pacientes qu’aguarden más de 90 díes pa operase. Nel casu d’esperes de más de 180 díes, la llista mengua en 143 persones al respective de setiembre.
El Sespa envalora que nes próximes selmanes va caltenese -ya inclusive se va amontar- esti ritmu d’actividá programada, siempres que nun se produza un aumentu de los ingresos por covid y otros virus respiratorios, lo qu’enzancaría la disponibilidad de cames. Igualmente, prevese unu amenorgamientu de les llistes y tiempos d’espera pa intervenciones, consultes y pruebes diagnósticas.
Mientres los primeros diez meses del añu efectuáronse 42.919 intervenciones quirúrxiques programaes, tantu ambulatorias como con ingresu, con una xubida del 9% respectu al mesmu periodu de 2021, a pesar de la elevada presión asistencial pola pandemia.
Amás, dende’l 20 de setiembre de 2021, fecha d’empiezu del primer plan de choque p’amenorgar los efectos de la pandemia nes llistes d’espera, los profesionales de los hospitales llevaron a cabu 5.773 ciruxíes vespertines adicionales. El mes pasáu realizáronse 533, un 67% más qu’en septiembre, lo que supon el meyor dato d’actividá quirúrxica peles tardes del añu. Les cifres de consultes y pruebes diagnósticas vespertines d’ochobre tamién fueron les más altes del exerciciu. Ello ye, algamáronse los mesmos rexistros que la suma de los meses de mayu a agostu.
-
El Sespa axudica 232 places d’auxiliares alministrativos
El Serviciu de Salú del Principáu (Sespa) axudicó 232 places estatutaries fixes de la categoría d’auxiliares alministrativos. El Boletín Oficial del Principáu (Bopa) publica güei la relación d’aspirantes que llograron un puestu.
Del total de les places ufiertaes, 187 correspuenden al turnu d’accesu llibre (183 de cupu xeneral y 4 para persones con discapacidá física) y 45 a la vía de promoción (40 de cupu xeneral y 5 pa persones con discapacidá física).
Los profesionales con plaza axudicada van disponer d’un mes, dende mañana, para tomar posesión nel área sanitaria correspondiente.
Per otra parte, aquellos que yá tuvieren un puestu en propiedá en dalguna otra categoría de personal estatutariu van poder optar, nel momentu de tomar posesión de la nueva plaza, a la situación de escedencia n’una de los dos. Asina, si nun se realiza unu pidimientu espresu, va entendese que se solicita la escedencia para la categoría d’orixe.