Jean-Sylvain Babin va siguir xugando nel Sporting. El xugador martinicanu y el club xixonés alcordaron la renovación del contratu del defensa para les próximes trés temporaes. Babin foi escoyíu meyor xugador de la temporada polos siguidores sportinguistes votantes del Troféu Mahou. El xugador diz que s’atopa «bien ilusionáu por tar en Xixón la temporada que vien» y «ta seguru que va cumplir l’oxetivu del ascensu col Sporting».
Etiqueta: Sporting
-
José Alberto: «Tenemos que ser más fuertes n’El Molinón»
José Alberto fixo balance de la temporada desque se fixo cargu del Sporting. Esplicó que non siempres pudo recurrir al sistema de xuegu qu’a él-y gusta, pero qu’apertaba la necesidá de sumar puntos. Destacó l’esfuerzu realizáu y el llastre xeneráu tres el partíu en Tarragona. Asumió que «fuimos irregulares» y non lo suficientemente sólidos en casa. Por eso, pa la próxima temporada señaló que «tenemos que ser más fuertes n’El Molinón«. Considerólo perimportante.
Amosóse satisfechu del trabayu realizáu énte’l Cádiz polos xugadores del filial, que «tuvieron al so nivel» nun partíu que definió d’ambiente frío». Destacó «l’entamu de xugada que tuvimos, anque nos faltó enriba daqué más de llegada, magar dispunximos de trés o cuatro causes pa marcar».
-
José Alberto va siguir «sacando conclusiones» con xugadores de filial
La normativa federativa indica que sobro’l terrén de xuegu deben de tar a lo menos siete xugadores con ficha federativa del primer equipu. Una espulsión d’unu d’ellos llevaría al Sporting a incurrir n’alliniación indebida. Por eso José Alberto, qu’anunció que va siguir dando minutos a xugadores del filial, adelantó que va caltener a un máximu de trés nel campu, partiendo de la base de qu’unu va tar con seguridá na portería.
«Trátase de siguir sacando conclusiones cola xente de baxo», señaló. Preguntáron-y por Gragera. «Tien opciones de xugar, como los restantes 17 que tán na convocatoria; trabayó bien», respondió. Espunxo que «llegamos a esti alcuentru final con un sabor agriduz, porque nun cumplimos los oxetivos». Añadió que «nun vamos mirar escontra otros marcadores, vamos salir a ganar en busca los trés puntos». Sobro la rivalidá, dixo qu’entiende que la hai, pero percima de too tán los mesmos clubes y la «nuesa profesionalidá».
De la temporada que conclúi echó en falta tener más regularidá. Cree que s’escapó la clasificación pal ‘play off’ n’El Molinón: «Nun llogramos remanar bien el control de los partíos y tener más efectividá». Sí cree que tuvo regularidá’l Cádiz, lo que-y dexó llegar a esti partíu con opciones. Destaca del cuadru andaluz el so «orde defensivu y los sos contras ofensives».
-
El Cádiz, l’últimu visitante de la temporada pal Sporting
El Sporting recibe esti sábadu a les 20.30 hores al Cádiz en partíu de LaLiga 123 correspondiente a la xornada 42 que va poner fin al campeonatu regular. Los xixoneses tienen la baxa federativa de Peybernes, ente que s’atopen convocaos coles sos respectives selecciones Lod y Dani Martín. Con un importante númberu xugadores con problemes físicos, José Alberto trabayó mientres los dos últimes selmanes con dellos xugadores del filial. La normativa federativa especifica la necesidá de qu’a lo llargo del alcuentru haya un mínimu de siete xugadores con ficha del primer equipu.
El Sporting entrénase esta mañana en Mareo. El técnicu roxiblancu va aguardar a los prolegómenos del alcuentru para dar cuenta tantu la convocatoria como l’equipu inicial.
El Cádiz, con una única novedá
Álvaro Cervera introdució una novedá na convocatoria pa Xixón con respectu al alcuentru del pasáu martes énte l’Estremadura nel Ramón de Carranza. Cayóse de la llista Vincenzo Rennella, que dexó al so sitiu a Djordje Jovanovic. La llista al completu ta integrada por Alberto Cifuentes, David Gil, Rober Correa, David Carmona, Ivan Kecojevic, Fali, Sergio Sánchez, Marcos Mauro, Alfonso Espino, José Mari, Álex Fernández, Salvi Sánchez, Ager Aketxe, Jairo Izquierdo, Djordje Jovanovic, David Querol, Mario Barco y Dejan Lekic.
El técnicu cadista señaló en rueda de prensa que «teníamos la oportunidá de siguir dependiendo de nós mesmos, nun foi asina. Fallamos, sabémoslo, llamentámoslo enfoma porque dimos pie a depender d’otros. Sicasí, vamos dir a ganar, vamos intentar ganar porque pueden pasar en fútbol bien de coses como se vio esti día».
Sobro posibles cambeos señalo que va haber dalgunu: «L’únicu que nun puede xugar en Garrido, sancionáu, al marxe de Juan Hernández y Pantic, y de Machís y Manu».
-
Gragera: «José Alberto confía muncho na cantera»
Anque inda xuvenil, José Gragera desenvolvióse na sala de prensa de Mareo como si d’un veteranu tratárase. «Atópome bien cómodu entrenando col primer equipu, ponénmelo fácil, ye un gran grupu», señaló’l mediocampista, que «considera qu’ameyoró dende entós» no personal. Reconoz que’l ritmu de xuegu ye distintu al respective d’otres categoríes, «va más rápidu’l balón». L’anterior xornada vio’l partíu dende’l banquín. Asegura que nun s’encegola cola posibilidá de debutar. Namá piensa «en trabayar», anque reconoz que faelo ye «un suañu pa tou canteranu», magar asume que «hai más xugadores nel equipu».
El Sporting ye daqué bien importante pa él: «Voi a El Molinón desque tengo trés años; para la mio familia ye daqué bien importante». Foi’l so padre’l que lu introdució y col que lleva viviendo tolos tramos de la so vida futbolística. Gústa-y falar y aldericar con él. Anueche vio’l partíu del Cádiz con él: «Afitámonos especialmente nos mediocampistes».
Esplicó que «José Alberto confía na cantera». Fíxo-y debutar nel filial y podría facelo bien lluéu col primer equipu. Naide-y dixo nada inda sobre la pretemporada: «Nun sé nada, pero reconozo que me gustaría facela col primer equipu». Vivió un gran añu, convocáu pola Selección Española Sub19, habitual nel filial, entrenándose nel tramu final lligueru col primer equipu… Sicasí, l’anterior tamién-y paeció bien bona, cuando «llegamos a la final de la Copa de Campeones (xuveniles)».
Gragera espunxo que nun-y resultaba fácil definise como mediocampista, anque se considera «un xugador d’equipu al que-y gusta trabayar en comuña». Afitar en Busquets y en Parejo y tocantes a xugadores que vio xugar nel Sporting, citó a Sergio Álvarez y a Rivera.
-
Última selmana de competición pal Sporting
El Sporting empieza la última selmana de competición. El sábadu va zarrar la temporada cola visita del Cádiz. En sumando los trés preceptivos puntos del partíu énte’l Reus, los de José Alberto encaren esti zarru de campaña col ánimu de quedar lo más alto posible na clasificación. Pela so parte, el cuadru andaluz tien inda pindiu d’apostar mañana énte l’Estremadura’l so penúltimu alcuentru, aplazáu pol fallecimientu de Reyes.
La selmana empezó en Mareo con delles ausencies nel entrenamientu del grupu: Dani Martín, cola Selección Española Sub21; Lod, cola de Finlandia; Geraldes, Aitor García y Álvaro Jiménez, col readaptador; Hernán Santana, na so casa por una afección vírica; Traver, sometíu a tratamientu y fisioterapia, y Diego Mariño, col rehabilitador, ente que Isma Cerro emplégase parcialmente colos sos compañeros. Ye baxa federativa pa la próxima xornada Peybernes.
El Sporting volverá entrenase mañana martes a les 10.30 hores en réxime de concentración, con comida a la fin del mesmu nes instalaciones raxones.
-
Robin Lod y Babin, convocaos coles sos selecciones nacionales
El xugadores del primer equipu del Sporting, Robin Lod y Jean-Sylvain Babin fueron convocaos poles selecciones absolutes de los sos países, Finlandia y Martinica respectivamente. Lod va concentrase con Finlandia del 4 al 12 de xunu, perdiéndose l’últimu alcuentru ligueru contra’l Cádiz. L’encuentru va celebrase’l sábadu 9 de xunu a les 20:30 hores. El combináu nórdicu va apostar dientro d’eses feches dos partíos clasificatorios para l’EURO 2020: contra Bosnia y Herzegovina el 8 de xunu en Tampere y contra Liechtenstein el 11 de xunu en Vaduz.
Pela so parte, Babin va colar una vegada termináu’l partíu énte los gaditanos n’El Molinón pa incoporarse a la seleccion de Martinica. El conxuntu nacional va concentrase yá pa xugar la próxima Copa Oro de la CONCACAF. El tornéu va llevase a cabu ente’l 15 de xunu y el 8 de xunetu n’Estaos Xuníos, anque va cuntar tamién con una see en Costa Rica y otra en Xamaica. Los caribeños tán encuadraos nel grupu A con Canadá, col que va apostar el partíu inaugural, Cuba y México.
-
Djurdjevic: «Namás pienso nel Sporting»
Djurdjevic pasó esta mañana depués del entrenamientu pela sala de prensa de Mareo. Dexó delles coses clares, como que primero de nada hai que cerrar l’actual temporada. «Somos profesionales y quédanos un partíu». Otra foi que depués «va tocar folgar pa empezar a preparar la próxima temporada» y que en tolos casos, «Namás pienso nel Sporting«. Ta feliz nel equipu xixonés: “D’equí gústame tou, l’afición, el club…”.
Marcó once goles y quier marcar más, pero antepón cualquier cuestión al ésitu del equipu. Preguntáron-y pol so ánimu de tornar a la Selección de Serbia: «Tien bien bonos xugadores, pero nun pierdo la esperanza».
-
Partíu d’entrenamientu para zarrar la selmana
El Sporting adelantró esti vienres unos minutos l’entamu del entrenamientu para realizar un calentamientu previu a la disputa d’un partíu informal. Los xugadores del filial Pedro Díaz, Gragera, Carlos Cordero, Pelayo Morilla y los guardametas Christian Joel y Javi Benitez.
Con Dani Martin, que se suma a última hora d’esta mañana a la Selección Española Sub21, tán fora d’esti ensayu por problemes físicos Geraldes, Traver, Álvaro Jiménez y Aitor, amás de Diego Mariño y Isma Cerro.
L’entrenamientu d’esta mañana, que foi de puertes abiertes, cuntó cola presencia nes graes del campu númberu 1 de 75 neños del Colexu Montedeva. Al nun partir de competición esta fin de selmana, los roxiblancos tienen descansu’l sábadu y domingu.
-
Dani Martín, a la Selección Sub21
Dani Martín ya piensa na Selección Sub21. Depués d’entrenase col Sporting esti xueves pela mañana na escuela de fútbol de Mareo, el porteru roxiblancu pasó pela sala de prensa onde aseguró asumir el retu «con muncha ilusión y bien contentu por haber entrada na convocatoria». El xixonés va tar mañana a la una de la tarde na Ciudá Deportiva de Las Rozas de la Real Federación Española de Fútbol, onde se va sumar al conxuntu nacional. Asume la competencia que se va atopar na portería y dirá «lluchar pol puestu». Ellí va coincidir nuevamente con Jorge Meré, «siempres un gran sofitu» para él, amás de ser «un bon amigu». El central del Colonia tuvo precisamente esta mañana de visita en Mareo.
Preguntáu pol balance del añu, recordó qu’empezó la temporada con una «mancadura grave pa un porteru», como foi la quiebra d’un deu d’una mano. «Depués llegó la Copa, con partíos que me dieron muncho enfotu», y finalmente acabó xugando en LaLiga tres la mancadura de Diego Mariño. La temporada déxalu «contentu». En referencia a la próxima campaña, aseguró vela «inda alloñada» y espunxo que “toos precisamos xugar, pero ye depués l’entrenador el que decide”.