– La profilaxis va alministrase en puntos habilitaos y en toles árees sanitaries
– Salú Pública encamienta especialmente la segunda dosis d’alcordanza a mayores de 60 años qu’entá nun la recibieren
– Les autoridaes sanitaries aconseyen l’usu de mázcaru a persones vulnerables y a aquelles qu’amuesen síntomes d’infecciones respiratories
El Serviciu de Salú del Principáu (Sespa) programó pa’l vienres una xornada de vacunación frente a la covid ensin cita previa. D’esta miente, van habilitase puntos d’alministración de la profilaxis y horarios en toles árees sanitaries. La directora xeneral de Salú Pública, Lidia Clara Rodríguez, encamienta la segunda dosis d’alcordanza a los mayores de 60 años, por cuenta de la so vulnerabilidá énte’l coronavirus, nun momentu d’aumentu de casos graves nesti grupu de población. El Principáu atópase dende la selmana pasada en nivel de riesgu baxu, con un aumentu de les hospitalizaciones qu’asitia la presión asistencial pola covid nun grau similar al de va seis meses. Les autoridaes sanitaries aconseyen l’usu de mázcaru a les persones vulnerables y a toes aquelles qu’amuesen síntomes d’infecciones respiratories pa evitar les andaes na so redolada familiar, tresporte públicu o llugares multitudinarios. Tamién apelen al so usu n’espacios escasamente ventilaos.
Los espacios y horarios previstos pa la vacunación nes ocho árees sanitaries son los siguientes: – Área sanitaria 1 (Xarrio). Centros de salú d’A Veiga, Navia, L.luarca y Trevías, de 12:00 a 13:00 hores.
– Área sanitaria 2 (Cangas). Centru de salú de Cangas, de 11:00 a 12:00 hores.
– Área sanitaria 3 (Avilés). Centru Comercial Parque Ástur, n’Avilés, de 11:00 a 14:00 hores.
– Área sanitaria 4 (Uviéu). Área d’estracciones del HUCA, n’Uviéu, de 15:30 a 18:00 hores.
– Área sanitaria 5 (Xixón). Tolos centros de salú de la área, de 11:00 a 13:00 hores.
– Área sanitaria 6 (Oriente). Tolos centros de salú de la área, de 11:00 a 13:00 hores.
– Área sanitaria 7 (Caudal): puntu de vacunación del Hospital Vital Álvarez Buylla, de Mieres, allugáu na planta 0. De 12:00 a 14:00 hores. –
– Área sanitaria 8 (Nalón): Centros de salú de Sama y La Felguera, de 12:30 a 13:30 hores.
Salú recuerda que les persones interesaes tienen d’allegar a los puntos habilitaos pa la vacunación col so carné d’identidá. La nueva xornada ensin cita enmárcase na campaña Vacúnate ho/Vacúnate ne pa captar a la población pendiente d’inmunizar. Coles mesmes, el Sespa caltien la vacunación abierta a les persones que la deseyen al traviés de solicitú de cita previa nos sos centros de salú de referencia.
Etiqueta: vacunación
-
El Sespa va celebrar el vienres una xornada de vacunación frente a la covid ensin cita previa
-
Salú actualiza’l certificáu covid dixital pa persones vacunaes con una dosis que pasaren la enfermedá y les inmunizaes con Janssen
La Conseyería de Salú actualizó’l certificáu covid dixital pa les persones vacunaes con una dosis que pasaren la enfermedá y pa les inmunizaes con Janssen, que la so pauta completa yera d’una única dosis, afaciéndose asina a los cambeos aprobaos pola Comisión Europea pa facilitar la movilidá de la ciudadanía pol territoriu européu.
Les persones que se vieron afectaes por estos cambeos yá pueden descargar el so certificáu actualizáu nel portal de Astursalud. Nel documentu va figurar la codificación de la so cobertoria vacunal como 2/1, en llugar de 2/2.
La validez del certificáu pa les dosis de refuerzu va ser indefinida, tanto pa vacunaos con Janssen como pa los que recibieron una única dosis de cualesquier otra marca por pasar la covid (2/1), según pa quien recibieron la profilaxis d’alcordanza en cuntando cola pauta completa del restu de vacunes (3/3). Per otra parte, el períodu de validez pa les persones con pauta completa (1/1 o 2/2) va ser de 270 díes, esto ye, de 9 meses dende la fecha d’alministración de la última pinchada.