Tante Blanco, fundador del grupu “Los Berrones” y autor de los sos grandes ésitos “Nun yes tu”, “Calcar na tená”, “L’Estudiante”, etc. va presentar, el próximu xueves 30 de payares a les 12:30 hores, na see de la SGAE n’Uviéu, el so segundu álbum d’estudiu que va poder adquirise la otru día, 1 d’avientu nes canales habituales.
Sol títulu Llegamos tarde al sieglu XXI, l’álbum inclúi 11 temes de Tante, na so habitual onda pop rock, qu’él mesmu califica como “Rock a lo torpe”. Melodíes pegadices y lletres iróniques y non exentes de sentíu del humor y que traten temes d’actualidá, sociales y cotidianos que toos conocemos pero nun solemos recordar. N’ocasiones, los temes tresfórmense en conciencia propia, convirtiéndose nun “pepito grillo” personal de quien les escucha.
“Llegamos tarde al sieglu XXI”, inclúi dellos temes melódicos que traten temes sensibles, con tou respetu y rellacionaos cola minería, actividá que nun puede dixebrase de la zona xeográfica de la que procede l’autor. Les lletres, son como les conversaciones que surden ente amigos, unes más allegres, otres inclusive, reivindicatives. Atrévese con un tema, “Afilador”, en eonaviego, la “fala” o llingua de la zona occidental d’Asturies, rindiendo homenaxe a esta zona y a esti oficiu, yá casi en desusu.
Cola producción del propiu Tante Blanco y de Luis Fonte, músicu uvieín, que tamién forma parte de la banda actual, presenta un discu bono d’escuchar, que podrá consiguise, nel so formatu físicu, nes tiendes habituales, y nel so formatu dixital nes principales plataformes de descargues musicales y streaming.
Xunto colos dos productores, la banda actual ta formada por Tino Norniella Fombona, al baxu eléctricu y Jaime “Sattán”, a la batería.
Pa la grabación, amás de los anteriores, Tante quixo cuntar con otros músicos que, nel so momentu, tamién pasaron pela banda “Stroza”. Son: Boniel Llaneza, a la batería y percusión; Marcos Martínez, al baxu eléctricu; Pelayo Roces Sibierski, a los teclaos y Cesar Blanco, al acordión.
La grabación realizóse en La Pola Llaviana, n’instalaciones propies de Tante Blanco, siendo masterizáu por Dani Sevillano n’Ovni Estudios, Llanera.
