El grupu de folk avilesín Tejedor dexa los escenarios depués de más de dos décades de trabayu, cuatro discos y delles xires internacionales. «Baxamos el telón depués de bien d’años n’activo, munchos bonos momentos y grandes amigos atopaos pel camín», anunció la banda nuna publicación na so páxina de Facebook.
«Agradecemos-yos munchísmo a caún de los que dalguna vez se molestaron en sentir la nuestra música, a toos esos organizadores que nos dieron la oportunidá de xubir al escenariu nesos más de 600 conciertos, a tolos músicos que nos fixeron medrar, lletristes, arreglistes, a toos esos técnicos que nos lo punxeron más fácil y n’especial a los más importantes, la nuestra xente más averao», escriben.
Tejedor dexa los escenarios depués de más de dos décades dedicaos dafechu a la música tradicional d’Asturies. El grupu nació en 1995 de la mano de los hermanos José Manuel, Javier y Eva Texedor. Nesi momentu entamaron a componer el so propiu repertoriu. Cuatro años más tarde debutaron con ‘Texedores de Suaños‘, discu producíu pol músicu escocés Phil Cunningahm. Depués llegaron ‘Llunáticos‘ (2003), ‘Música na maleta‘ (2006) y ‘Positivu‘ (2011), esti últimu trabayu ya ensin Eva Tejedor.
Nos últimos años Texedor participó nos más prestixosos Festivales Europeos, como’l Festival Intercélticu de Lorient en 1999, 2003 y 2007,. Tamién percorrieron mediu planeta con conciertos en países estremaos como Estaos Xuníos, Canadá, México, Venezuela, Kuwait, Francia, Italia, Portugal, Holanda, Bélxica, Escocia ya Irlanda. Amás, fueron teloneros de Van Morrison en Valencia y Xixón y de Sinead O’Connor en Lorient.
