El PSOE de Xixón propón la creación de 312 viviendes públiques en suelos residenciales y dotacionales de propiedá municipal. Tal que señaló en rueda de prensa’l conceyal del Grupu Municipal Socialista, Tino Vaquero, el Conceyu dispón d’un ampliu patrimoniu públicu qu’hai que movilizar y sobre’l qu’hai qu’actuar pa poner a disposición de les vecines y vecinos vivienda pública d’arriendu a precios afayadizos y vivienda protexida de preciu llimitáu.
“Coles conocencies que tenemos sobre les propiedaes municipales, la nuesa propuesta d’actuación contempla la construcción de 158 viviendes a construyir en 5 finques residenciales de Ciares-Viesques, Coto-Viesques, Roces y La Camocha, y de 154 viviendes en 4 parceles dotacionales allugaes nel Rik’s, nel Lloredal, en Nuevu Xixón y en Tremañes”, asegura.
La elección de los allugamientos y de suelos nes dotacionales ye frutu d’un analís detalláu de les dotaciones públiques esistentes de cada barriu y la certidume de que pueden ser destinaos a vivienda ensin comprometer otres infraestructures o dotaciones necesaries. “El nuesu conceyu nun puede ser ayenu a esta oportunidá”, añede Vaquero.
Los socialistes tamién estudiaron fórmules pa movilizar esi suelu. El gobiernu local puede actuar como promotor, llogrando financiamientu al traviés del presupuestu municipal o por aciu la vienta de parceles pa la construcción de viviendes unifamiliares de la so propiedá de les que dispon na zona periurbana y rural, o poniendo esos suelos nel mercáu conforme los mecanismos de xestión previstos pa la collaboración públicu-privada (cesión, concursos, cooperatives o’l derechu de superficie). Coles mesmes, puede recurrir pa la so execución a convenios con otres alministraciones públiques y a la execución per parte del sector priváu por aciu la constitución de derechos de superficie sobre les parceles o por aciu enayenadura de suelos residenciales vía concursu condicionada a la construcción de vivienda protexida.
“Trátase, a última hora, de xestionar de forma eficiente los recursos públicos. Tenemos suelu y los medios llegales, si nun hai vivienda en Xixón la única responsable va ser Carmen Moriyón”, añede Vaquero, quien va preguntar mañana nel Plenu pola web de Suelu Públicu del Conceyu yá que nun dispón de tola información del patrimoniu públicu de suelu, un recursu que’l PSOE solicitó’l pasáu mes de xunu pa movilizar parceles col fin de promocionar vivienda pública.
“L’alcaldesa y el so equipu tienen que tomar la iniciativa. Nós tenemos un plan, el Plan 1000V, al traviés del cual llevamos meses proponiendo midíes pa facer frente al problema de la vivienda. Nun tien sentíu tener esos suelos ende, ensin destín dalgunu y ensin saber qué facer con ellos. La ciudá tien necesidá de vivienda y el Conceyu puede facer muncho. El gobiernu del Principáu d’Asturies abrió la vía de la vivienda dotacional nel recintu de Peritos. Otres comunidaes autónomes fixéronlo yá. La vía ta abierta; el Conceyu tien que tomar esi camín y ponese manes a la obra pa executar vivienda pública cola collaboración del sector priváu. Trátase d’echar bien los númberos en cada parcela o llote de parceles, prever un arriendu máximu y afayadizu p’amplies capes de población y xugar cola posibilidá que da la llei nel derechu de superficie de poder estendelu mientres un períodu temporal que va hasta 99 años y onde va haber que prever el períodu d’amortización pal sector priváu y l’evidente beneficiu. Eses viviendes, amás, una vegada termináu’l derechu de superficie, van ser viviendes de titularidá pública”, conclúi Vaqueru.
