Del 22 al 24 de setiembre del 2023 va tener llugar en Trabau (Degaña) l’eventu CachuFest ’23, un festival qu’axunta cultura, tradición, naturaleza, patrimoniu y etnografía na aldega de Trabau nel conceyu de Degaña. Un alcuentru pa poner de relieve la cultura y tradición del suroccidente d’Asturies, y en particular la tierra de los cunqueiros. Mientres la fin de selmana va haber una programación variada d’actividaes qu’inclúin conciertos, visites empuestes, cata de vinu, cine, showcooking y actividaes infantiles:
– Conciertu acústicu de Ferla Megia y directu de Llevólu’l Sumiciu.
– Cata de vinos al cargu de Bodegas La Verdea (D.O.P. Cangas).
– Visites guíaes a la contorna rellacionaes col arte, el patrimoniu, la etnografía y la naturaleza.
– Conciertos de música tradicional asturiana, con 6 Riales, Eva Texedor & Les Pandereteres, Guieldu y Alienda.
– Showcooking al cargu de David Montes d’El Carboneru (TPA) con degustación incluyida.
– Actividaes infantiles al cargu de Cometa Verde con xuegos tradicionales, talleres, maxa y muncho más.
Dientro del festival montaráse un cine rural con pantalla xigante y el vienres pela tarde va haber un ciclu de cine sobre despoblación cola proyección de los documentales y llargometraxes con “Soñando un lugar” (Alfonso Kint, 2019); “Honeyland” (Tamara Kotevska, Ljubomir Stefavov, 2019) y “El Desvío” (Pablo Tosco, 2020). Amás, el sábadu 23 estrenaráse de forma esclusiva “Il Mulín”, nuevo llargometraxe del director Alex Galán, director ente otras películas de Galerna y salea (2023), Xalda (2023), El Reino de los pastores (2022) o Salvaje, el cuento del lobo (2022).
