Travis Birds aportó a Uviéu como lleguen los grandes artistes a los sos conciertos, con un sold out anticipáu de va díes y una contorna de la Sala Gong con una montonera de xente que s’agolpaba a les sos puertes pa esfrutar de la xira de la cantante madrilana na que presenta’l que yá ye’l so tercer discu d’estudiu, Perro Deseo. El conciertu, qu’entamaba’l proyectu San Miguel On Air, yera’l primeru de la cantante na ciudá uvieína.
D’esta manera, a les 21:30 salíen al escenariu de la sala uvieína los músicos qu’acompañen a Travis a cualesquier puntu de la xeografía. A lo llargo d’una hora y media, la cantante repasó dellos de los cantares que formen el so últimu trabayu xunto con dalgunos de los sos ésitos, con un final nel qu’aparecieron los temes más reconocíos. Los bises yeren pa los tres cantares que llevaron al llugar onde s’alcuentra Travis Birds. D’una banda, ensin naide más nel escenariu, toco defender 19 días y 500 noches después y, tres presentar a la so banda, encaró la fin del conciertu con Eduardo y Thelma y Louise. Travis Birds esnaló per Uviéu espardiendo’l so deséu.
