Tres empreses asturianes fabricarán hidroxel pa manes y superficies

Empreses asturianes axúntense pa producir 15 tonelaes de líquidu hidroalcohólico necesario pa la desinfección

0
671

Les empreses asturianes Asturquimia, Auxquimia y Metrohm DropSens axuntáronse pa fabricar hidroxel pa la desinfección de manes. Esti productu ye necesariu na llucha contra’l COVID-19. La iniciativa cunta col financiamientu de la Fundación EDP, que va poner más de 40.000 euros pa producir 15.000 llitros de xel hidroalcohólico. La Conseyería de Ciencia, Innovación y Universidá va dar soporte y va coordinar esta alianza empresarial.

La propuesta parte de Metrohm DropSens, pero ye un proyectu colectivu y altruista. Auxquimia facilita les sos instalaciones y ingredientes pa la mezcla y Asturquimia materies primes pal productu. La Fundación EDP asume los costos pa la compra d’etanol y isopropanol, otres materies adicionales y el tresporte. Toles empreses alliniáronse pa qu’esti productu llegue al personal que lo precisa de forma desinteresada. La empresa Auxquimia yá fabricó y cedió esta selmana una partida de 350 botes d’hidroxel a les fuercies de seguranza y guardes forestales d’Asturies. La Conseyería de Desenvolvimientu Rural, Agroganadería y Pesca va ser la encargada de facilitar la distribución a estos sectores.

L’equipu cunta con tener el primer llote a gran escala a últimos de selmana

Tamién se ta trabayando pa consiguir que l’hidroxel pueda usase pol personal sanitario. Pa eso actúa en dos víes. Per una parte, los promotores de la iniciativa entraron en contactu con una empresa farmacéutica pa que pueda realizar la producción na so sede. D’esta forma cuntaráse cola acreitación del productu pa usu de personal sanitario. Per otra, se quier trabayar na posibilidá de dispensar l’alcohol a la farmacia del HUCA pa que pueda fabricar directamente l’hidroxel que precise.

«La producción d’esti xel supondría’l suministru de tol sistema asturianu pa un mes”, apuntó Borja Sánchez. El conseyeru de Ciencia, Innovación y Universidá esplicó que’l consumu hospitalariu ye de 500 llitros diarios. L’equipu, que coordina Pablo Fanjul, de Metrohm DropSens, cunta con tener el primer llote a gran escala a últimos de selmana. De mano, va envasase’l xel en botelles d’un llitru o garrafes d’ente 5 y 10 llitros.