El Conseyu de Muyeres, reuníu esta tarde de forma estraordinaria, escoyó’l lema ‘‘Tu yes como elles» pa acompañar los actos conmemorativos del 8M col oxetivu de visibilizar a muyeres de Xixón qu’ocupen cargos o desenvuelven oficios altamente masculinizados.
Les demandes feministes contribuyeron a romper estereotipos y a asitiar na axenda de les polítiques d’empléu acciones pa romper la fuerte segregación cola que cunta’l mercáu llaboral. A pesar d’ello, entá subsisten estereotipos que condicionen la elección d’estudios y profesiones acorde a factores de xéneru que caltienen la masculinización de dellos sectores, la infravaloración del trabayu de les muyeres y la fienda salarial.
Al traviés d’esti lema, que va ser el exe de la campaña del Día Internacional de les Muyeres, búscase afitar referentes de muyeres que desempeñen trabayos en contestos masculinizados, potenciando ente muyeres y neñes la diversificación profesional y la busca d’alternatives llaborales fora de los davezu acomuñaos a muyeres.
