El Gobiernu d’Asturies amplió la nómina de les fiestes y actividaes d’interés turísticu del Principáu, en dando’l vistu bonu para incluyir na llista la Feria d’Indianos de Colombres (Ribadeva), les Xornaes Gastronómiques de la Llámpara de Quintes (Villaviciosa), la Feria del Miel de Boal y la Preba de la Sidra (Uviéu).
El Conseyu Asesor de Turismu considera acreditaos los requisitos pa qu’estos cuatro eventos pasen a formar parte del llistáu de les fiestes d’interés turísticu rexonal pola so orixinalidá, tradición popular, valor sociocultural y antigüedá. Toos ellos destaquen pola calidá de la so organización y la so capacidá p’atraer visitantes.
Feria d’Indianos
El conceyu ribadedense consiguió, al traviés de la Feria d’Indianos, que se celebra dende 2008, rindir tributu a la cultura hispanoamericana qu’apurrió a esti territoriu la emigración de los sieglos XIX y XX. Ye una cita que conxuga nuna fin de selmana actos culturales, gastronómicos y lúdicos, toos ellos rellacionaos cola temática indiana. Amás, el texíu asociativo tien una función fundamental na organización d’esti alcuentru, que #cada añu recibe a un mayor númberu de visitantes. El Conceyu de Ribedeva foi la entidá que presentó la candidatura d’esta fiesta.
Xornaes Gastronómiques de la Llámpara
Les Xornaes Gastronómiques de la Llámpara en Quintes y Quintueles (Villaviciosa) sumen yá más de trenta ediciones. Cada añu, alredor
al mes de mayu, dambes localidaes maliayas entórnense para entamar esti eventu gastronómicu, qu’implica a bona parte de la hostelería local. La Sociedá Cultural Recreativa Clarín de Quintes ta detrás de la organización de les xornaes y ye el mesmu organismu que les presentó a esta reconocencia.
Feria del Miel de Boal
La Feria del Miel de Boal ye tou un referente pal sector n’Asturies. Tanto a nivel mercantil como cultural, foi ganando pesu a lo llargo de les más de trés décades que se lleva entamando. El Conceyu de Boal ye la institución que presentó la candidatura d’esti eventu, que consigue configurar un auténticu programa cultural y turísticu alredor al productu estrella del so conceyu: el miel.
La Preba de la Sidra
La popular cita de la cai Gascona d’Uviéu celébrase na primera quincena de mayu y consiste na presentación del so productu sidreru per parte de los llagares que participen na prueba, para la degustación y la votación de los visitantes. La solicitú foi realizada pola Asociación d’Hosteleros de Gascona El boulevard de la sidra.
Con estes cuatro incorporaciones, na actualidá esisten n’Asturies 67 fiestes declaraes d’Interés turísticu rexonal. La primera foi la celebración de La Madalena, de Llanes, que recibió’l distintivu en 1991.
