Vendióse’l 92% de les actividaes y algamóse’l 100% de la fauturación disponible.
El conceyal de Promoción Económica, Emplegu, Turismu y Comerciu Llocal de Xixón, Santos Tejón Llaneza, presentó güei los resultaos de la promoción “Gijón Activo: Vive un verano diferente”. Esta promoción -que s’enmarca nos alcuerdos de la mesa de concertación ‘Gijón Reinicia, Acuerdo para la Reactivación Económica y la Recuperación del Empleo Local’, robláu pol Conceyu de Xixón, la Federación Asturiana d’Empresarios y les xuniones comarcales de la Unión Xeneral de Trabayadores y Comisiones Obreres- asoleyó en xunetu y ufiertó al públicu actividaes turístiques con un descuentu del 50%. El 50% restante asumióse al traviés de los fondos empobinaos a la recuperación del sector alcordaos nel pautu de Gijón Reinicia.
L’oxetivu d’esta campaña de promoción foi xenerar actividá ente les empreses de turismu activu y esperiencies, unes de les más afeutaes pol parón turísticu que supunxo l’andanciu de la Covid-19. Poro, la iniciativa quería aidar a compensar l’amenorgamientu d’ingresos d’estes empreses, ganar veceros y veceres nuevos y complementar les ventes que les empreses yá realicen.
Arriendes d’ello, la campaña sirvió p’amosar Xixón como destín d’esperiencies, promocionar los productos turísticos de les empreses y dio a conocer esti segmentu turísticu a la ciudadanía.
Facturación total de 88.000€
Marcha nórdica, parapente, surf, moto d’agua, globu aerostáticu, escursión en barcu, flyboard, visites a Cimavilla, al Xixón costeru y rural… Hasta 21 empreses de turismu activu y visites guiaes participaron na iniciativa. A fin d’agostu, vendióse’l 92% de los cupos asignaos a les empreses y algamóse’l 100% de la facturación disponible.
“Trece de les 21 empreses participantes vendieron el 100% de los cupos; 18, más del 50%. Esto supunxo una facturación total de 88.000€, cuntando lo qu’ingresaron les empreses direutamente del veceru y el 50% asumíu al traviés de los fondos empobinaos a la recuperación del sector alcordaos nel pautu de Gijón Reinicia”, esplica Daniel Martínez Junquera, direutor de Gijón/Xixón Turismo.
Xixón Turismu fixo una encuesta a les empreses participantes y recibió 12 rempuestes. D’estes 12 empreses, 10 consideren que la so fauturación foi mayor respeutu a 2020 y 9 que la campaña aidó a ameyorar la so fauturación. Namái una de les empreses cree que nun obtuviera’l mesmu resultáu ensin esta campaña y les 12 consideren positivu que l’Alministración collabore con esti tipu d’iniciatives de reactivación del sector turísticu.
Ampliación de la campaña a setiembre
Pola mor de la bona acoyida, la Mesa de Concertación Social, Gijón Reinicia, decidió ampliar la campaña tol mes de setiembre con una ufierta nueva d’actividaes. Poro, afitáronse 370 cupos nuevos d’actividaes, lo que supondrá una fauturación estra de 30.000€, de los que’l 50% va ser abonáu al traviés de los fondos empobinaos a la recuperación del sector alcordaos nel pautu de Gijón Reinicia.
