Dende güei, los que paseen per Cimavilla van poder atopase, virtualmente, con Rambal, unes cigarreres, un grupu de mareantes, Xosefa y Gaspar Melchor Xovellanos o un Pelegrín. Estos personaxes van cuntar la hestoria’l barriu altu xixonés. Arriendes d’ello, van poder ver una reproducción de la puerta d’entrada de la muralla romana, la decoración típica con farolillos o el refuxu antiaéreu qu’hai so la Casa Paquet.
Fuera’l barriu altu, otra ruta va averar al visitante al ‘Xixón ente sieglos’, una dómina na que’l desendolcu industrial marcó l’entamu de la hestoria recién de Xixon, con una burguesía medrante y una presencia importante del proletariáu qu’afitó’l calter xixonés d’anguaño. Nesti casu, van recrease les sardineres, los balnearios antiguus de la sablera de San Llorienzo, l’Atenéu Obreru, la vida proletaria na Ciudadela de Celestino Solar, la burguesía de la cai la Merced o les celebraciones clásiques del Antroxu nos Campinos de Begoña.
Estes dos rutes formen parte del proyeutu nuevu de Xixón Turismu, que propón, al traviés de la realidá aumentada, una esperiencia única, prestosa y didáutica que fai un percorríu pela hestoria ya’l xeitu de la ciudá asturiana. Les rutes tan disponibles en castellanu, inglés y francés. La idea ye desendolcar seis rutes nueves ente 2021 y 2022.
“La realidá aumentada incorpórase al sector del turismu como una tecnoloxía qu’ufre una montonera de posibilidaes nesta estaya. La forma de viaxar camudó col asoleyamientu d’Internet. Anguaño los turistes prefieren organizar les sos rutes de forma personal, contautar con otros viaxeros y sobre manera informase con detalle de tolos sitios que visiten”, comenta Daniel Martínez Junquera, director de Xixón Turismu.
.
Les rutes van tar disponibles nes tiendes d’iOS y Google de baldre. Tamién van poder descargase en www.visitagijon.com. En descargándola, los y les visitantes van poder esbillar el puntu d’interés al que quieran averase y sedrá l’aplicación mesma la que los guíe hasta ellí, onde van atopar una placa colorada de señalización.
“La tecnología AR permite al usuario/a ampliar su experiencia de visita, descubriendo aspectos del destino más sensoriales o ligados a su bagaje cultural y a la idiosincrasia de su paisanaje”, esplica Daniel Martínez Junquera.
La incorporación de la realidá aumentada como teunoloxía puntera d’un destín dixitalizáu y turísticamente intelixente iclúise nel Plan d’Aición de Destín Turísticu Intelixente de Xixón 2020-22.
CIMAVILLA AR TOUR: 8 POI’S
- La muralla: reproducción de la puerta d’entrada a la muralla romana.
- Hospital de Corraxos: pelegrín. Camín de Santiagu en Xixón.
- Casa Natal de Xovellanos: Xosefa y Gaspar Melchor Xovellanos.
- Tabacalera: cigarreres.
- Casa’l Chinu: decoración confarolillos.
- Plaza de la Corrada: Rambal.
- Capiella la Soledá: los mareantes.
- Casa Paquet y refuxu antiaéreu.
XIXON ENTE SIEGLOS AR TOUR: 6 POI’S
- Campu Valdés: balnearios de la sablera San Llorienzo.
- Ciudadela de Celestino Solar: neñes y neños xugando.
- Campinos de Begoña: Antroxu clásicu.
- Escuela de Comerciu: Atenéu Obreru.
- Cai La Merced: burguesía y modernismu.
- Les Lletrones: sardineres.
