L’estudiu, espublizáu na revista “Nature”, contradiz la teoría xenómica de la especiación simpátrica (onde nun hai barreres pa reproducise)
Una investigación con collaboración de la Universidá d’Uviéu refundió lluz sobre’l procesu pol qu’una variedá o raza pue llegar a convertise nuna especie estremada en contestos nos que nun hai nenguna barrera física que torgue la reproducción de los sos individuos colos d’otres variedaes, una cuestión qu’intrigó a los biólogos evolutivos dende Darwin.
Si una especie queda dixebrada físicamente de les otres, entiéndese que s’atropen les diferencies y que surda una nueva, pero, ¿por qué produz esto cuando nun esisten barreres? La conclusión del estudiu, espublizáu na revista “Nature”, ye qu’esti procesu asocede si la variedá tien un calter o traza morfolóxica diferenciador nel qu’intervienen munchos xenes. Hasta la fecha suponíase qu’esto yera más probable nel casu de que fueren pocos xenes.
Les resultancies contradicen, poro, la teoría xenómica de la especiación simpátrica (onde nun hai barreres físiques que torguen la reproducción). Les y los investigadores estudiaron un tipu de pexes neotropicales de llagos formaos en cráteres d’ocho volcanes inactivos de Nicaragua, unu de los pocos casos reconocíos d’especiación ensin barreres. El trabayu tuvo lideráu por Andreas Kautt y Axel Meyer, de la Universidá de Konstanza (Alemaña), cola collaboración de Gonzalo Machado Schiaffino, de la Área de Xenética del Departamentu de Bioloxía Funcional de la Universidá d’Uviéu.
Estudiando en gran detalle’l xenoma de 453 individuos de distintes especies y variedaes d’estos pexes, l’equipu investigador constató qu’aquelles variedaes que difieren nuna traza que tien la so base xenética polixénica (esto ye, munchos xenes arreyaos codifíquense pa determinar la traza, por casu que los pexes seyn allargaos) pueden promover más fácilmente la especiación rápida en simpatría, en comparanza con aquelles variedaes que tienen por diferencia por una traza que ta determinada por unu o unos pocos xenes (monu/oligoxénicos): exemplos: color anaranxáu; llabios hipertróficos (bien prominentes)
