La hestoria del asturianu al traviés de Xixón ye la última ruta estrenada pol ciclu de visites XixónTours, entamáu pola plataforma VerAsturies.com en collaboración con XixonAlDía. El percorríu, guiáu pol académicu y fondu conocedor de la hestoria del asturianu Inaciu Galán, va entamar cola llegada del llatín a Asturies, arrancando nes termes romanes y va percorrer más de dos mil años del idioma asturianu al traviés de los espacios de la ciudá.
Un percorríu entreteníu dende los proyectos d’una Academia de la Llingua Asturiana de Gaspar Xovellanos y la obra de Xosefa Xovellanos, primer muyer escritora n’asturianu, y xixonesa, hasta l’actualidá, pasando pelos espacios de la hestórica manifestación de Conceyu Bable pola entrada del asturianu nes escueles en 1976, ente otros munchos momentos clave pa entender la realidá del idioma y de la propia Asturies d’anguaño.
La ruta tien una duración d’alredor de 1 hora y media y va celebrar un pase esti sábadu 13 de xunetu a les 12 la mañana. Pueden llevase perros, pero hai una parada na que s’entra un ratín a un muséu, onde nun dexen entrar perrinos. La ruta tien un preciu de 12 euros p’adultos, 6 € pa los rapacinos ente 13 y 18 años, y ye de baldre pa los de 12 p’abaxo.
Les inscripciones pueden facese na páxina web de XixónTours.
