Un cantar d’Anabel Lee titúlase Roma caerá. Enta nun se sabe si va caer o non la ciudá italiana, pero na nueche del vienres, Anabel Lee fizo que cayera Uviéu col conciertu qu’ufrieron na Sala La Salvaje, esi refuxu nel que yá nun quedaben entraes dende va dos selmanes.
El tríu catalán salió al escenariu uvieín un poco más tarde de les 22:30 pa defender unos temes a los que, dende’l primer momentu, s’entregó’l públicu qu’agüeyaba al grupu inclusive dende la subidoria. Mientres hora y media, la xente foi disfrutando de caún de los temes de la banda de Terrassa, faciendo que la sala tuviera una alta temperatura pol calor qu’el públicu-y daba a los Anabel, pero tamién pola fuercia espresiva que diba medrando selemente, con cada cantar que remataba, dende los instrumentos de los músicos.
Hubo cantares de tou tipu na nueche del vienres en La Salvaje, entamando con Cabezas de cartel, qu’abrió’l conciertu. Darréu, diben sonar Qué quieres de mí o Sobran defectos. Hasta que llegó la traca final, qu’entamaba con Enchochado de ti, cover del cantar de Don Patricio. La folixa remató col públicu a entregáu a los dos últimos temes: Natural para Vogue y La mejor canción del año. Uviéu y La Salvaje cayeron énte Anabel Lee y la ciudá entera nagua por volver a velos.
