Aprobada la Llei de Bientar Animal, no que cinca a los perros queda’l desendolque de los reglamentos concretos pal seguru, los esámenes a los dueños, etc. Esti foi’l primer animal dondu, que fai más de 10.000 años que ta con nós. Pero entá hai munches carencies. Por exemplu, Xixón presume de ciudá dog friendly cuando nun tiene nin una zona de suelta de perros en llibertá vallada dafechu. D’esta miente, Avilés, Uviéu, Llugones, Villaviciosa por poner llocalidaes averaes sí que les tienen.
Hai un valláu pa perros incompletu na collación de Viesques, al llau del CHAS, que dellos xixoneses vienen reclamando al Ayuntamientu de Xixón la so completa finalización. Col envís de soltar a los perros cola seguridá de que nun fuxan. Munchos nun permanecen colos dueños si hai ruíos o queden distrayíos pol tráficu o por otres causes.
La Conceyalía correspondiente remite a Emulsa y esta al Serviciu de Parques y Xardinos. Toos se comprometen a completar el valláu pero finen col remite al rexistru municipal pa remitir la solicitú ya informase meyor del so cursu.
Y nun falemos del tresporte nel bus ensin tresportín, que ye realidá n’otres 19 ciudaes del Estáu mientres qu’equí sigue prohibío.
Xixón queda retrasada en comparanza con otros conceyos con más enfotu y menor númberu que los 38.000 perros que se calculen. Amás, Asturies ye la comunidá autónoma con más perros per habitante, trés per cada neñu/a (INE). L’amenorgamientu de zones pa perros de la Rede d’espacios públicos pa perros en llibertá y el so allugamientu en zones espuestes al tráficu cercanu faen más necesaries la presencia de a lo menos dos fasteres vallaes na ciudá natal de Xovellanos. “La cultura y los valires morales d’un pueblu mídense pol tratu que dan a los animales”, dicíen naquella dómina.
La cultura naturaliega ye escosa y vese a les clares pol pocu interés nel bientar d’estos animales. Eso sí, figurar como ciudá dog friendly queda perbién p’atrayer al turismu de mases. Ye lo que paez qu’interesa a los gobernantes, más que caltener la calidá de vida de los nacíos equí.
Munchos habríen viaxar cerquina, a Francia o a los Países Baxos pa ver cómo nun hai perros abandonaos y cómo los respeta la xente. Tanto que cuasi nin lladren.
