VESU, que se va celebrar ente’l vienres 21 y el domingu 23 de xunu, acaba d’anunciar les seis primeres bandes que van formar parte del cartelu d’anguaño del festival; Xoel López, Fillas de Cassandra, Rocío Sáiz, Carlos Llabres, La Milagrosa y los alemanes Komfortrauschen conviértense asina nos primeros nomes d’una cita qu’anguaño se reinventa pa siguir apostando pola música independiente.
Xoel López conviértese asina nel primer artista que repite col so proyectu musical en VESU, dempués de ser unu de los participantes na primer edición del festival en 2020. La organización quixo asina repitir en normalidá un conciertu que, entós daquella, celebrar
en plena pandemia con distancia de seguridá y mázcaros.
Fillas de Cassandra (Sara Faro y María SOA) van actuar per primer vegada n’Asturies. Una de les grandes revelaciones del panorama musical español van presentar en VESU el so nuevu espectáculu: Últimas Dionisíacas, nel que, amás de revisitar los ésitos del so primer LP Acrópolis van dir dexando pincelaes de lo que va ser el so nuevu trabayu discográficu.
Rocío Sáiz llega a VESU con nuevu discu sol brazu. ‘Autoboicot y descansu’ ye un trabayu comprometíu col soníu del pop sintéticu de los ochenta. Un trabayu que la ex integrante de Les Chillers y Monterrosa entiendi “como un road-trip intensísimo del primer al últimu cantar”.
El multi-instrumentista, cantautor y productor gallegu Carlos Llabres forxóse la so identidá artística al traviés de la música. Nesa travesía atopó una voz única y auténtica. El so álbum debú, tituláu Peregrino, acaba de ser publicáu y axunta nun solu trabayu los sos raigaños gallegos, l’amor polo rural y la simplicidá na creación.
La Milagrosa ye una banda de dream-punk con traces de postpop procedente de Madrid liderada pol cantante y compositor Germán GUES que cola so voz grave y templao, xunida a los ritmos de ‘drum machine’ seguro que van sosprender al públicu del festival.
A lo último, el alemanes Komfortrauschen van aterrizar per primer vegada n’España con un únicu conciertu nel nuesu país y va ser en VESU. Olvidémonos de les caxes de ritmu o los ordenadores, los berlineses son una banda de techno en vivu que se ve y suena como nenguna otra. El tríu alemán suma ritmos mecánicos, guitarres acedes y baxos atronadores
cola precisión d’una fábrica del so país.
Estes primeres bandes suponen les primeres confirmaciones del festival, unu de los más
esperaos cada empiezu de branu, y onde volverá tar presente Vibra Mahou, la plataforma de música de Mahou Cinco Estrelles que xenera alcuentros alrodiu del directu, demostrando una vegada más el so compromisu con Asturies y la música.
Amás, tamién se ponen a la vienta’l segundu tramu d’abonos a un preciu de 39,95€ (+GG), entraes que darréu se trocarán por pulseres d’accesu y pagu nel festival, y que tán disponibles al traviés de la web www.vesu.es.
