Yera unu de los anuncios más esperaos y VESU desveló finalmente la distribución del so cartelu per díes. Xoel López va volver al festival y va xubise nel Escenariu Vibra Mahou’l sábadu 22 de xunu y lo va facer arrodiáu d’otres dos bandes gallegues, Fillas de Cassandra y Carlos Ares.
Venticuatro hores antes, quien van tener la responsabilidá d’encabezar VESU van ser los sevillanos Derby Motoreta’s Burrito Kachimba, que van tar acompañaos por La Milagrosa, Tatta & Denso y Johnny Garso. Two Door Radio Club van poner tamién la so particular banda sonora.
El cartelu del sábadu complétase cola asturiana Elena del Frade, los catalanes Hologramma y la banda d’electrónica alemana Komfortrausche. Mediocre DJ va ser l’encargáu de amenizar los distintos espacios de VESU na xornada del sábadu. Pal domingu, y como zarru per tolo alto, un cartelu netamente femenín col pop ácidu de Las Dianas, la espectacular puesta n’escena de Rocío Sáiz y la DJ Lucía Dilema pa que’l públicu quede con más ganes de VESU.
Amás, el próximu llunes 20 de mayu van salir a la venta les entraes de día al traviés de la web www.vesu.es. Hasta entós sigue vixente’l preciu del tercer tramu d’abonos a 39,95€ (+GG).
VESU, que se va celebrar ente’l xueves 20 y el domingu 23 de xunu, volverá cuntar col sofitu de Vibra Mahou, la plataforma de música de Mahou Cinco Estrellas que xenera alcuentros al rodiu del directu, demostrando una vegada más el so compromisu con Asturies y la música. La Central Artística de Bueño (CAB) en La Ribera y los Xardinos de La Rodriga nel corazón d’Uviéu van allugar tolos conciertos d’esta edición.
