La Xunta de Gobiernu de Xixón aprobó na so sesión telemática d’esti martes, 26 de xineru, les bases de la convocatoria del Plan Llocal d’Empléu 2021-2022, enmarcaes nes sovenciones del Serviciu Públicu d’Empléu del Principáu d’Asturies, que nesti casu ye de 3’425 millones d’euros, distribuyíos en dos añalidaes de 1.712.500 euros caúna.
El Plan d’Empléu 2021/2022 va permitir al Conceyu la realización de 155 contratos d’un añu de duración, y ente colectivos especialmente desfavorecíos dende’l puntu de vista del accesu al empléu. Ello ye que 69 d’estes contrataciones van tar acutaes pa persones mayores de 45 años, y otres 21 pa persones pertenecientes a families perceptores del Salariu social Básicu o Ingresu Mínimu Vital. Les bases contemplen amás, de forma preferente nel procesu selectivu, otres circunstancies qu’atienden a condiciones económiques o sociales característiques de los colectivos vulnerables.
El períodu de solicitú va abrise mañana miércoles, 27 de xineru hasta’l 9 de febreru. A partir d’esa fecha empecipiará’l períodu de selección de los participantes, que va facer posible la contratación, previsiblemente, mientres los meses de marzu o abril de 2021.
