Visita Xixón torna, tres años depués, a la 45ª edición del Salón Mundial de Turismu de París, que se celebra del 17 al 20 de marzu na capital francesa, tres l’anulación de les ediciones de 2020 y 2021 pola mor del coronavirus. Poro, Xixón viéndese de nueves -xunto a Uviéu, con quien comparte mostrador dientro del estand de Turespaña- como destín turísticu nel mercáu francés.
Xixón va amosar na feria los sos atractivos como destín turísticu: la gastronomía, les sableres, l’actividá cultural y festiva, les visites a llagares, la mayor rede de museos d’Asturies, Llaboral Ciudá de la Cultura, el Xardín Botánicu Atlánticu y la gran ufierta hotelera y de turismu activo.
Yá son diez años los que Visita Xixón tuvo presencia na principal feria de viaxes francesa. Nes dos ediciones caberes en 2018 y 2019, celebraes enantes de que l’andanciu del coronavirus anulara toles cites internacionales, foron Xixón, Avilés y Uviéu quienes participaron de forma conxunta so la marca ‘Ciudades de Asturias’.Nesa edición última, el Salón Mundial de Turismo de París recibió 114.000 visites y cuntó cola participación de más de 600 turoperadores.
Francia ye’l principal mercáu emisor de turistes a la ciudá y ta cada vez más interesáu nos destinos de la España Verde. Supón más del 21% del turismu estranxeru qu’aporta a la ciudá, llonxe de Reinu Xuníu, que con un 13% ye’l segundu mercáu n’importancia. Poro, ún de cada cinco turistes estranxeros que visiten Xixón aporta del país galu.
Visita Xixón presentó, amás, esti vídeu onde promocionaron la ciudá.
