Xixón afítase como referente turísticu nel norte d’España

0
78
Nueves empreses xúnense al ‘Compromisu de Calidá Turística’

La cifra de viaxeros agospiaos n’establecimientos hoteleros rexistrada en xunetu en Xixón ye de 49.691 persones, con un incrementu del +8,1% respeuto al mesmu mes del añu caberu. La cifra de nueches d’agospiu algama les 111.255, con un medru del +12,7%. La estancia media afítase en 2,2 nueches y medra un 0,1% respeuto al añu caberu.

Estos datos remanecen de la Encuesta d’Ocupación Hotelera espublizada güei pol Institutu Nacional d’Estadística y tres los axustes realizaos pola consultora Invesmark p’actualizalos según les places hoteleres disponibles anguaño. L’incrementu rexistráu por Xixón (+8,1%) en númberu de viaxeros asítiase perriba de la media rexonal (+5,5%) y per delantre de los siete principales destinos de la España Verde.

No tocante al númberu de nueches d’agospiu, l’incrementu ye del +12,7% respeuto a xunetu de 2018. Poro, la cifra afítase como la meyor de la serie hestórica. Esti incrementu ye tamién el más bultable de la España verde. La tasa d’ocupación rexistrada en xunetu asítiase nel 71,6%. Medra un +9,3% respeuto al añu pasáu y afítase como la más bultable de la serie hestórica.

Acumulao xineru-xunetu

La cifra total de viaxeros en Xixón nos siete meses primeros del añu xube a les 250.351 persones. Representa un incrementu del +2,5% respeuto al mesmu periodu del añu caberu. La cifra de nueches d’agospiu algama les 491.676, con un incrementu del +5,4%. Tanto una como otra son los valores máximos de la serie hestórica pal semestre primeru del añu.

La tasa d’ocupación rexistrada nos siete meses primeros del añu algama’l 47,9%, con un incrementu respeuto al añu caberu del +0,6%. Ye la meyor tasa d’ocupación de la serie hestórica pa esti periodu.