«Esto nun ye l’Antroxu de Xixón», asina reza’l cartelu del Antroxu xixonés nesti 2021. La crisis sanitaria de la COVID19 y les restricciones impuestes pola Conseyería de Salú del Gobiernu d’Asturies obligaron al Departamentu de Festexos del Conceyu de Xixón a reinventar la próxima edición d’esta Fiesta d’Interés Turísticu Rexonal”.

Del 12 al 16 de febreru Xixón nun va vivir el so tradicional Antroxu, tal qu’asegura Alberto Ferrao, Conceyal d’Educación y Cultura: «El virus nun entiende de fiestes, nun estrema feches». Por ello, nun se va entamar dende Divertia nenguna actividá que suponga concentración de persones y d’esta manera suspende’l pregón, les actuaciones musicales, el pasucais y los concursos de mazcaritos y charangues. Coles mesmes, tampoco se va decorar, nin se va allumar el Paséu de Begoña.

D’esta miente, l’Antroxu 2021 va treslladase al formatu dixital, magar que se va caltener la tradición d’antroxar la estatua de Pelayo (en fecha ensin determinar y n’horariu nocherniegu pa evitar presencia de públicu). Coles mesmes, tamién la Sardina va ser protagonista, pero va vivir el so particular Antroxu “enlatada” na so residencia xixonesa, dende onde va colgar videos na web de Festexos y dende onde va facer directos nos sos perfil de les sos redes sociales. Otru de los protagonistes, vía on-line, va ser Agustín, (Alberto Rodríguez), el conocíu presentador del Concursu de Charangues, que va ufiertar vídeos y conexones mesmo na web que nes sos redes sociales.

El Departamentu de Festexos cunta de nuevu nesta edición, p’animar el Antroxu, cola collaboración de les charangues xixoneses, coles que caltuvo contactu nos últimos meses. Les charangues, qu’anguaño nun pudieron ensayar y nun pudieron axuntase al ser grupos numberosos, van arriquecer la web con vídeos d’actuaciones pasaes, videos nuevos y tamién con imáxenes de cómo viven l’Antroxu, cumpliendo les midíes y les restricciones sanitaries.

Divertia tamién va abrir esi espaciu virtual mientres l’Antroxu a los y les xixoneses pa qu’unvien les sos fotografíes y se conecten nos directos ufiertaos pola Sardina nel so perfil d’Instagram.

El cartelu d’esti Antroxu de 2021 reza “Esto nun ye’l Antroxu de Xixón”… Un cartelu, diseñáu por Divertia, (ensin el coloríu habitual, cola R al aviesu, con un Antroxu “pates arriba”) para recordar, como asegura Lara Martínez, xerente de Divertia, que «nun ye’l Antroxu que nos gustaría entamar, pero ye’l que toca… Tien de primar la seguranza y tenemos la responsabilidá de favorecer una convivencia que garantice la salú de la ciudadanía».

En feches próximes van ufiertase más detalles sobre la programación de los vídeos y la participación de les charangues.