El Gobiernu asturianu auspicia la celebración del Día Européu del Camín de Santiago del 18 al 20 d’esti mes. Nueve conceyos asturianos, ente ellos Xixón, sumáronse a la iniciativa europea. La conseyera Berta Piñán presentó la programación d’esti eventu en Ḷḷuarca. El Camín de Santiago foi’l primer Itinerariu Cultural Européu declaráu como tal pol Conseyu Européu, en 1987, y les sos rutes principales, les d’España y Francia, incluyéronse na Llista del Patrimoniu Mundial de la Unesco, de manera socesiva, en 1993, 1999 y 2015, añu esti postreru en que s’incorporaron los Caminos de Santiago del Norte, nos que s’integren les rutes xacobees asturianes.
Anguaño, a propuesta del Gobiernu d’Asturies, la Federación Europea, l’organismu encargáu de xestionar estos caminos en cuantes que son Itinerariu Cultural Européu, decidió convocar el Día Européu del Camín de Santiago. La celebración va ser secundada en rexones y localidaes de cinco países: España, Portugal, Francia, Holanda y Polonia. El Principáu ye la comunidá que más actividaes entama, con 24. Portugal y Polonia programaron 12, Holanda, 6, Francia, 3 y Galicia, 2.
N’Asturies, nueve conceyos sumáronse a la conmemoración: Xixón, Uviéu, Avilés, Cuideiru, Villaviciosa, Valdés, Castrillón, Ribeseya y Tinéu. La programación incluye dende itinerarios guiaos per tramos urbanos o rurales del Camín de Santiago, hasta xornaes de llimpieza ciudadana de tramos concretos. Va haber tamién visites guiaes a monumentos del Camín de Santiago nos que s’amuesa la vinculación del patrimoniu cola ruta y charles informatives.
Exa cultural
Piñán destacó la importancia qu’esti día européu tien p’Asturies porque ayuda a divulgar la idea del Camín de Santiago como exa cultural. Amás, manifestó que dexa a Asturies garrar una posición de lideratu nun proyectu européu con estensión a cinco países. «D’esta manera, dase cumplimientu al oxetivu qu’apaez nel Llibru Blancu del Camín de Santiago de favorecer la presencia de les nuestres rutes xacobees nes grandes exes culturales europees”.
Piñán tamién resaltó qu’esta iniciativa fai posible celebrar n’Asturies a lo llargo d’una fin de selmana una ventena d’actos en nueve conceyos, lo que calificó de «daqué insólito hasta la fecha». Finalmente, la conseyera consideró que la celebración supón un apueste por introducir acciones medioambientales na promoción cultural, con actividaes, como les de Xixón y Valdés, que tienen por oxetu realizar tramos del Camín de Santiago al empar que se llimpien.
