L’Ayuntamientu de Xixón contrató a 172 persones mientres un añu al traviés de los planes d’empléu pal 2023.
Esti mediudía tuvo llugar, nel Centru Municipal Integráu del Coto, l’actu d’acoyida de les y los beneficiarios d’estos programes nel que participó’l conseyeru d’Industria, Empléu y Promoción Económica, Enrique Fernández; el director xeneral d’Empléu y Formación del Principáu, Pedro Fernández-Raigoso; el conceyal de Promoción Económica y Empléu, Santos Tejón; y el director xeneral de Promoción del Empléu, David Rionda.
Trátase de 38 mozos menores de 30 años que van adquirir la so primer esperiencia profesional y 134 persones paraes de llarga duración, de les qu’el 67% son mayores de 45 años y el 42% pertenecen a families perceptores de Salariu Social Básicu. En cuanto al xéneru, el 56% del total son muyeres.
Ensertáronse a principios del mes de xineru nos distintos puestos de trabayu de servicios y departamentos municipales rellacionaos con perfiles profesionales como derechu, maxisteriu, arquitectura, informática, alministración, llimpieza, pintura, albañilería o educación infantil, ente otros.
L’oxetivu de los Planes d’Empléu ye la meyora de la empleabilidá en colectivos con especiales dificultaes d’insertamientu llaboral. Son, poro, un preséu de les polítiques actives d’empléu pa l’alquisición de la práctica profesional o pa la reactivación de la vida llaboral, qu’implica una meyora nes posibilidaes d’accesu al empléu nel futuru.
Anguaño, dientro de los planes d’empléu hai dos programes activos: “Planes d’empléu nel marcu de los itinerarios integraos d’activación nel ámbitu local” (Plan d’Empléu 2022-2023, y “Sovenciones a Conceyos del Principáu d’Asturies pa la celebración de contratos formativos pa l’alquisición de la práctica profesional fayadiza al nivel d’estudios’’ (Primer Esperiencia Profesional). Nesti casu, de les 172 persones contrataes pol Ayuntamientu, 134 correspuenden al primer programa y 38 al segundu.
