Como suel ser habitual la celebración d’una esposición, sobre manera cuando se trata d’un asuntu pocu tratáu, ye motivu pa que los museos reciban donaciones. Nesti casu trátase d’una colección de 25 fotografíes en b/n y color de la fábrica de la Compañia d’aplicaciones eléctro-industriales CRADY S. A., fundada en Xixón en 1957 y zarrada en 2012. Cuando se desmanteló la fábrica, de la mesma qu’asocedió en tantes otres empreses xixoneses, l’archivu se tiró. Nestos archivos había munches fotografíes de les instalaciones fabriles, de los procesos de fabricación, de máquines nueves, de los productos fabricaos pa catálogos o publicidá, de los stands de feries d’industria y comerciu, etc.
El donante ye Pablo López López, natural de Is (Ayande) y A Fonsagrada (Lugo), que trabayaba pa una subcontrata de Crady y vio como se tiraba l’archivu de la fábrica. Él recoyó estes fotografíes qu’agora lleguen al Muséu del Pueblu d’Asturies dende A Fonsagrada con una carta onde diz: “La empresa onde trabayaba facía los caltenimientos de Crady, y tocóme vaciar pa esbarrumbar. Son les poques que pudi recuperar. Encantáu de que salgan del caxón y sirvan pa recordar el pasáu recién del pueblu asturianu”.
Les fotografíes contienen imaxes de los años sesenta y setenta del pasáu sieglu d’instalaciones de la fábrica de Crady, stand de feries, maquinaria y trabayadores. Munches de les fotografíes tán roblaes por Semeya L.lena, de Xixón.
Esta donación súmase a los archivos fotográficos d’empreses que caltien el Muséu del Pueblu d’Asturies, como los de Xixón Fabril S. A., Manufactures Bernar, Camises Simco y l’escelente archivu de fotografía industrial de Foto Acuña, qu’ufierten una imaxe de les fábriques, los sistemes de producción y el mundu del trabayu industrial nel Xixón del sieglu XX. Una pequeña selección de toes estes fotografíes ata na esposición «Xixón. Epicentru fotografia, 1858-1992», qu’axunta más de 1.300 fotografíes procedentes de les colecciones de los museos municipales del Ferrocarril d’Asturies, Casa Natal de Xovellanos y, sobre manera, del Muséu del Pueblu d’Asturies, y na qu’hai un apartáu dedicáu puramente al «Xixón industrial».
