El Altar del Holocausto aportó a Xixón el pasáu sábadu pa ufiertar a la xente de la ciudá una de les sos grandes homilíes. Y de manera perbona respondió’l públicu xixoniegu, con una sala que cuntaba con una montonera de xente. Momentos enantes del conciertu, Reaper Model, batería de la banda, yá confirmara a esti mediu que «ye una ciudá que nos apurrió muncho y a la que-y debemos muncho». Y Xixón respondió como merez la banda salmantina.
Les puertes abrieron un poco más tarde de les 20:30 hores nuna Sala Acapulco qu’amenizaba l’entamu del conciertu con música ambiental que nos treslladaba al entamu d’una homilía que taba por llegar. Pasaes les 21:20, el soníu bien potente d’El Altar del Holocausto enllenó la sala al ritmu del bombu de Reaper Model mientres que’l públicu xixoniegu s’entregaba a la escucha y al baille, pero tamién a la quietú de los silencios promulgaos pola banda en metá de dellos cantares.
La canción que, ensin dulda, resonó y fixo esfrutar sobre manera a la xente foi la yá clásica «Lucas I, 26-38», y que, tres rematar de tocala, los cuatro componentes salmantinos llevaron la ovación de la sala. De la mesma manera, el públicu entregóse al conciertu cuando’l guitarrísta Weasel Joe baxó del escenariu pa llanzar la muria de la muerte depués de que una voz agradeciera al públicu la so presencia.
El Altar del Holocausto amosó la nueche del sábadu qu’esiste una auténtica comunión ente los cuatro componentes y la villa playa. Xixón esfrutó una vegada más, de les homilíes d’una de les bandes más en forma del panorama del estáu.
