Del 17 al 25 de payares, sol lema “Déxate esllumar pol meyor cine d’autor”, Xixón va convertise nun enclave pa celebrar la cinefilia cola programación de cerca de doscientes películes que se van complementar, ente múltiples actividaes, con alcuentros ente espectadores y cineastes. Una invitación al públicu pa esfrutar del cine en comunidá y nes sales y tener la oportunidá de charrar colos más de doscientos directores, actores y profesionales del sector que van visitar la ciudá asturiana por cuenta de esta cita col cine independiente internacional.
Precisamente la participación del públicu ye lo que reivindica’l cineasta Diego Llorente cola so obra, titulada M/odelo para armar. Per tercer añu consecutivu, el Festival preciede los pases de les sos proyecciones con una curtia pieza cinematográfica empobinada por un cineasta d’Asturies. “Busco da-y al espectador materia pal so pensamientu col desarme d’un modelu (de lo que ye una película, de lo que podría ser una película), pa que esti acabe’l procesu que yo namá echo a andar”.
Pela so parte, el ilustrador y diseñador gráficu Marco Recuero inspiróse pa realizar la imaxe xeneral del 61 FICX “nel mar y les puestes de sol, tamién nel momentu que dexa de llover y sale el sol. Agua y lluz dende un puntu de vista más astractu y, sobremanera, festivu”. Una imaxe que celebra la solidez del festival con más de 60 ediciones a los sos llombos y lo que supón esti acontecimientu, non solo pa la ciudá de Xixón sinón tamién pa la escena cinematográfica actual fuera de les nueses fronteres.
