Xixón foi preelegida pa convertise nuna de les 100 ciudaes europees climáticamente neutres pa 2030. Supera asina la primer fase d’esta iniciativa de la Unión Europea que constitúi un compromisu coles polítiques medioambientales y que cunta col sofitu de la Comisión Europea.
Trátase de la Misión «Ciudaes intelixentes y climáticamente neutres» de la Unión Europea, al traviés de la cual los conceyos escoyíos van convertise en centros d’esperimentación ya innovación. Va sofitase, va promover y va amosar el so tresformamientu escontra la neutralidá climática d’equí a 2030 con recursos qu’enceten cuestiones como la planificación y diseñu urbanu, la movilidá urbana sostenible, la eficiencia enerxética o la xestión de borrafes y economía circular.
Pa ello, caúna de les cien ciudaes pioneres que formen parte de la Misión va roblar el Contratu de ciudá pol clima, afechu y ellaboráu conjuntamente. Esti contratu va apurrir asesoramientu y asistencia personalizada y va facilitar el desbloquéu d’inversiones y oportunidaes de financiamientu para la realización de proyectos.
Tamién se va crear una rede de coordinación nacional que favoreza l’intercambiu d’esperiencies y aprendizaxes. Coles mesmes, esta rede va apurrir nueves plataformes para actuar y meyores recursos para diseñar y poner en práctica acciones pol clima que movilicen a les persones y a la sociedá civil y motiven cambeos nos comportamientos.
El Conceyu de Xixón presentó la so candidatura a esta iniciativa’l pasáu mes de xineru, iniciativa que busca, amás, la implicación de la ciudadanía p’ameyorar la salú y el bienestar de les persones.
En superando la fase de elexibilidá, la Comisión Europea va evaluar les propuestes presentaes pa formar parte del proyectu y ta previstu que sía nel mes d’abril cuando dean a conocer les cien ciudaes intelixentes y climáticamente neutres.
