La Xunta de Voceros, en representación de tolos Grupos Municipales qu’integren el Plenu del Conceyu de Xixón, aprobó una Declaración Institucional con motivu del Día Mundial contra’l Cáncanu na so sesión del xueves 4 de febreru. N’ella manifiesten la so solidaridá con toles persones afectaes por esta enfermedá y declaren el so compromisu para contribuyir a responder a les sos necesidaes y desaniciar l’impactu de la pandemia nes sos vides.
El testu de la Declaración ye’l que se reproduz darréu.
El cáncanu álzase como’l principal problema sociosanitariu a nivel mundial. Ye la segunda causa de muerte a nivel mundial y proyéctase una medra de más del 30% de nuevos casos pal 2030. Anguaño, nel nuesu país, 1 de cada 2 homes y 1 de cada 3 muyeres van ser diagnosticaos de cáncer a lo llargo de la so vida .Envalórase qu’esta enfermedá afecta a 1,5 millones de persones n’España y diagnostíquense nel nuesu país cuasi 280.000 nuevos casos cada añu.
La crisis provocada pol andanciu de la Covid-19 nun fixo sinón agravar la situación de fraxilidá social y sanitaria de les persones con cáncanu y les sos families como colectives doblemente vulnerables, pol cáncer y pola Covid-19.
Les persones con cáncanu y les sos families tán viviendo diversos y severos impactos d’esta crisis:
Impactu sanitariu: pruebes diagnósticas y tratamientos retrasaos, incertidume y necesidá d’información qu’ayude a amenorgar el mieu a l’andada.
Impactu emocional y social (personal y familiar): soledá ensin deseyar, ansiedá por retrasos en tratamientos y/o pruebes diagnósticas, mieu a l’andada y a volver a los hospitales, sufrimientu énte les dificultaes p’acompañar y ser acompañaos nel procesu de final de la vida y pol agravamientu de les dificultaes económicu y llaboral.
Por too ello, la Xunta de Voceros, en representación de tolos Grupos Municipales qu’integren el Plenu del Conceyu de Xixón:
Con motivu del Día Mundial contra’l Cáncanu manifiesten la so solidaridá con toles persones afectaes por esta enfermedá y declaren el so compromisu pa contribuyir a responder a les sos necesidaes y desaniciar l’impactu de la pandemia nes sos vides.
Nesti sentíu, abógase por que llévense a cabu les acciones pertinentes pa desaniciar la so situación d’especial vulnerabilidá, amás de garantizar, en condiciones d’equidá, los drechos de les persones con cáncanu y les sos families.
Coles mesmes, manifiesten el so sofitu a la investigación del cáncanu, como preséu imprescindible na llucha contra esta enfermedá, y treslladen la so reconocencia a toles asociaciones y entidaes que tán acompañando a les persones afectaes pol cáncanu pol so compromisu y llabor siguíu.
