Xixón ta a puntu pal so gran Día de Reis. Les sos Maxestaes los Reis Magos y el Príncipe Aliatar van llegar al Puertu Deportivu de la ciudá mañana a les 11:00 hores. Melchor, Gaspar y Baltasar van xubir a los sos vehículos y van saludar al públicu rexuntáu na zona, nesta ocasión ensin contactu coles neñes y neños. A les 12:30 hores van empezar los alcuentros col públicu nel Teatru Xovellanos, mientres 4 pases pa los que s’escosaron les 3.308 localidaes disponibles.
Pela tarde, la cabalgata va partir a les 17:30 hores de la zona Oeste de la ciudá, de la Cai Simón Bolívar, y va percorrer la ciudá hasta llegar a Xardinos de la Reina. El llargor del percorríu va ser de 5.670 metros. A les 20:00 hores (aprox) les sos Maxestaes van ufiertar los sos tradicionales discursos dende’l balcón de la casa conceyu.
La cabalgata va tar formada por 50 grupos y más de mil persones, amás del personal d’organización de Divertia, Protección Civil, Policía Local, Bomberos y EMULSA. “La Bandona” de Gaites va abrir el desfile con más de 60 músicos. Van participar 11 xarrés, 4 d’elles con música en directu. Unu de los exércitos del desfile ta formáu por actrices y actores profesionales. Distintes asociaciones vecinales y otres agrupaciones formen parte del desfile, tales como Rusto. Vecinos de Caldones, Asturpatín, Asoc. Xente Xoven, Asoc. Vecino San Andrés de los Tacones, Asoc. Vecino Castiellu de Castiello Bernueces, Asoc. Vecinos Xovellanos, etc. Numberosos grupos folclóricos tamién participen na comitiva: Excelsior, Xovellanos, Trebeyu, Xolgoriu, Los Xustos, El Turruxón, ente otros. Una representación de les charangues de la ciudá van animar el desfile con percusión y bailles.
Les Bandes de “Jesús Divín Obreru” y “Señora de los Dolores de Gradefes”, van viaxar dende Llión pa participar nel desfile.
