XIXÓN, 20 de setiembre de 2022.- Da igual iviernu o branu. Tolos díes, si l’orbayu lo permite, un grupu de xixoneses avérense a un requexu de la sablera de San Llorienzo a tomar el sol. A esi requexu nómenlu davezu “el tostaderu”. Ellos son los protagonistes del spot nuevu de Xixonomía, la campaña de promoción turística de Xixón. “Gasto más en crema y bañadores que en abrigos”, comenta una de les protagonistes.
L’alcaldesa de Xixón, Ana González, presentó güei na Escuela de Comerciu l’episodiu nuevu de la Xixonomía, la ciencia del vivir bien. Nel actu afayáronse tamién el conceyal de Turismu, Santos Tejón, y el direutor de Visita Xixón, Daniel Martínez Junquera. La campaña quier poner en valor a les persones, el xeitu meyor valoráu de los y les turistes que visiten Xixón, y ser un paragües nuevu sol que s’amuese la imaxe de la ciudá a visitantes y posibles turistes.
El spot nuevu corresponde al 6u. principiu de la Xixonomía, postuláu por Newton: “Tou cuerpu va permanecer en reposu, a nun ser por fuercia mayor” y xúnese a los otros dos principios yá desendolcaos anguaño. Ye posible consulñtar toos na web www.xixonomia.es .
Tratáu de Xixonomía y realidá aumentada
Nel actu tamién se presentó’l Tratáu de Xixonomía, que va sirvir como cartafueyu turísticu pa quien visite la ciudá. Esti tratáu -un estudiu antropolóxicu… y antolóxicu de Xixón, los sos requexos, costumes y, sobre manera, los sos interesantes especímenes- inclúi información sobre la hestoria de Xixón, las costumes y la identidá, l’axenda cultural y festiva, la gastronomía, los principales recursos y atractivos turísticos…
Arriendes d’ello, a llo largo de 88 páxines, el llector va atopar personaxes reales de Xixón que, al traviés de la realidá aumentada, cuntarán les sos hestories de viva voz. Pa ello, ye preciso descargarse en móvil l’aplicación “Gijonomia AR”.
Con esta creatividá nueva, la campaña de publicidá y promoción de Visita Xixón pa 2022 sigue en marcha. Esta seronda, la campaña va dir empobinada a Andalucía, onde van realizase aiciones promocionales de cai col bus turísticu en Sevilla y Málaga y onde se va insertar l’anunciu de Xixón en mobiliariu urbanu, publicidá online, tv online y redes sociales (Spotify, Facebook, Instagram y Youtube). Amás, a ello xúnese la publicidá en medios especializaos, como Viajes National Geographic, Hola Viajes y Viajar.
