El conseyeru d’Ordenación de Territoriu, Urbanismu, Vivienda y Derechos Ciudadanos, Ovidio Zapico, anunció que’l Gobiernu d’Asturies acutó nos presupuestos de 2025 una partida de 30.000 euros pa sofitar el llabor del futuru espaciu cultural de La Benéfica, un proyectu lideráu pol artista multidisciplinar Rodrigo Cuevas que va empecipiar la so andadura en L’Infiestu el próximu 15 de marzu.
Según el conseyeru, la iniciativa llogra “treslladar a la realidá los planteamientos de l’Axenda 2030”, amás de materializar la collaboración públicu-comuñal. Nesti sentíu, el director xeneral d’Axenda 2030, Juan Ponte, sorrayó qu’esti proyectu “ye un exemplu de manual” de los valores que busquen los Oxetivos de Desenvolvimientu Sostenible (ODS).
Zapico visitó la última fase de les obres de rehabilitación de La Benéfica acompañáu pol artista Rodrigo Cuevas, la viceconseyera de Derechos Ciudadanos, Beatriz González Prieto; el director xeneral Juan Ponte, l’alcalde de Piloña, Iván Allende, y la responsable de la coordinación estratéxica de La Benéfica, Cristina Moreno.
El titular de Derechos Ciudadanos tamién adelantró la intención de la Dirección Xeneral d’Axenda 2030 de caltener esta partida en próximos años. “Esta subvención nominativa nun va ser namás pa 2025; vien pa quedase”, indicó. “El proyectu pon a les persones nel centru, trai prosperidá a esta zona d’Asturies, promueve los procesos de participación, ye sostenible, porque curia del planeta, y vela pola convivencia y la paz”, citó ente les razones pa sofitar el llabor de La Benéfica.
La Benéfica ye una asociación ensin ánimu d’arriquecimientu que’l so proyectu principal consiste na recuperación d’un vieyu teatru de cerca de 400 metros cuadraos, construyíu en 1926, pa remocicalo como espaciu cultural y d’acción comuñal. La intención de los promotores ye dar vida a un espaciu qu’axunte la espresión artísticu-cultural, l’acción comuñal y la llucha contra l’abandonu y la despoblación de les zones rurales, amás de favorecer la tresmisión de conocencia ente distintes xeneraciones.
