FACUA-Consumidores n’Acción refuga la propuesta del Principáu de llevar la zona azul xunto al campus y al Hospital de Cabueñes. Nun comunicáu, l’asociación opónse de manera firma a esta midida contemplada nel proyectu de plan de movilidá del Gobiernu asturianu. El plan pasa por estender l’aparcamientu de pagu al campus de Viesques, la Universidá Llaboral y l’Hospital de Cabueñes. Facua encamienta al Conceyu a refugar esta posibilidá porque nun ye la manera de «garantizar la movilidá y l’accesu de los ciudadanos a los servicios educativos y sanitarios».
Nesti sentíu, FACUA alvierte de que la espansión d’una zona d’aparcamientu de pagu supon «una clara llimitación a los derechos de los ciudadanos a la circulación«. L’asociación llamenta qu’ún de los colectivos más afectaos ye’l de los estudiantes universitarios que, según denuncien, carecen de tresporte públicu abondu como pa prescindir del priváu.
Otramiente, l’asociación amuesa la so esmolición pol cobru a los usuarios del Hospital de Cabueñes, yá sía por problemes de salú o acompañando a persones que precisen de servicios sanitarios. «Van tener de faer frente al desembolsu d’un importe adicional namás pa poder aportar a un recintu al que s’allega por necesidá». Asina, l’asociación recuerda que la regulación del tráficu y l’estacionamientu de vehículos ye competencia del Conceyu, velando porque los ciudadanos dispongan d’una correcta xestión de los aparcamientos ensin tener que sufrir abonos extra «puramente recaldatorios».
FACUA tamién señala que los ciudadanos tienen de tener «llibertá de movilidá y llibertá d’accesu a la educación y a los centros de salú», pa garantizar asina los artículos 27 y 43 de la Constitución Española que recueyen que «toos tienen el derechu a la educación» y reconozse el derechu «a la protección de la salú», respectivamente.
