Adrián Barbón pidió güei reflexón y valentía a los grupos parlamentarios p’abordar la reforma del artículu 4 del Estatutu d’Autonomía y facer oficiales les llingües propies de la comunidá: l’asturianu y l’eonaviegu.
Adrián Barbón, convocó esta mañana a los voceros de los grupos parlamentarios: Dolores Carcedo (PSOE), Álvaro Queipo (PP) y Convocatoria por Asturies-IX-Más País-IAS, Xabel Vegas, mesmo qu’ a los miembros del grupu mistu, Covadonga Tomé y Adrián Pumares, xunto col presidente de l’Academia de la Llingua Asturiana (ALLA), Xosé Antón González Riaño, pa encarar esti alderique, que’l Gobiernu d’Asturies va llevar tamién a la Xunta Xeneral.
L’Executivu asumió la propuesta plantegada nel alcuentru pola ALLA, qu’establez un horizonte d’ocho años pa esplegar la oficialidá. Coles mesmes, el refechu informe presentáu por González Riañu calcula un retornu a la sociedá cercanu al 4% del Productu Interior Brutu (PIB) de la comunidá. Pela contra, el documentu reflexa que’l costu pa l’Alministración autonómica rondaría los 25 millones añales, solo 14 más de lo que s’invierte agora añalmente en polítiques de normalización llingüística.
“L’aplicación de la oficialidá tiense que definir con consensu. Hai munchos modelos y Asturies va construyir el suyu propiu, nel que naide ta obligáu a usar l’asturianu o l’eonaviegu”, garantizó’l presidente nuna rueda de prensa.
Tres la xunta, que según esplicó Barbón celebróse nun clima conciliador y constructivu», el presidente emplazó a los grupos parlamentarios a qu’afiten la so posición y plantegen les sos aportaciones hasta’l próximu 11 de xunu. Amás, el xefe del Executivu comprometióse «a llegar hasta’l final nesti procesu», lo qu’implica la presentación d’una proposición de llei na Xunta Xeneral pa modificar l’artículu 4 del Estatutu d’Autonomía.
“La oficialidá ye la única forma de caltener les llingües propies. Si Santa María del Naranco tuviera en peligru invertiríase lo que fixera falta, porque ye un patrimoniu milenariu, al igual que lo son l’asturianu y l’eonaviegu”, afirmó.
