El Gobiernu d’Asturies va poner en marcha a partir de xunu una tarxeta monederu dirixida a families con fíos menores d’edá en situación d’estrema vulnerabilidá, que van poder trocar nel supermercáu por productos de primer necesidá. La Conseyería de Derechos Sociales y Bienestar valora qu’esta midida va beneficiar a cerca de 2.000 llares que perciben el salariu básicu y que los sos ingresos s’asitien per debaxo del 40% de la renta media nacional.
Esta iniciativa supon un cambéu de filosofía nel programa d’asistencia a persones en situación d’estrema vulnerabilidá financiáu pol Fondu Social Européu Plus (FSE+), yá que sustitúi a la tradicional entrega directa y respuende al oxetivu d’amenorgar la probeza infantil. Cola tarxeta monederu, les families van poder aportar directamente a alimentos frescos y alimentación infantil, mesmo qu’a productos básicos d’hixene, incluyíos los d’hixene femenina. Esti sistema supón una notable ameyora respectu a la repartida tradicional d’alimentos.
La puesta en marcha del nuevu sistema, qu’anguaño va movilizar 1,5 millones n’Asturies, va llevar a cabu al traviés de Cruz Roja, entidá que se va encargar de la distribución, control y siguimientu. A partir de xineru de 2025, les autonomíes van asumir por completu la xestión de les tarxetes y Asturies va cuntar con una cuantía envalorada de 8,7 millones hasta 2027.
L’importe mensual que van percibir les families nes sos tarxetes va depender del númberu de miembros que les integren. Asina, un adultu y un neñu van recibir 130 euros; 160 euros una familia de trés miembros, 190 si son cuatro y 220 si son cinco o más.
Les tarxetes van tener una carga inicial pol importe equivalente a trés meses y van poder utilizase en cualesquier de les cuatro cadenes de supermercaos axudicataries del serviciu llicitáu pola Cruz Roja a nivel nacional y con implantación n’Asturies: Carrefour, Eroski, Alimerka y Alcampo. Los llares van poder beneficiase de les tarxetes mientres un máximu d’un añu.
Amás, les families nun van tener que solicitar la tarxeta, yá que van ser los mesmos servicios sociales municipales o autonómicos los que se van dirixir a elles de manera directa, evitando asina cargues burocrátiques.
El procesu d’implantación d’esti métodu va empecipiar poles árees de servicios sociales municipales I (occidente) II (suroccidente) y VI (oriente), col fin de testar el procedimientu, según la coordinación interadministrativa y cola Cruz Roja, antes d’estendelo a tol territoriu.
