La reforma de Llei de Turismu va llegar de forma inminente al Conseyu de Gobiernu pa la so aprobación, en llogrando’l vistu bonu de la Comisión Asturiana d’Alministración Local (CAAL), según anunció na Xunta Xeneral la vicepresidenta, Gimena Llamedo. Esti cambéu ye una de les bases p’ameyorar la regulación de les viviendes d’usu turísticu, que se multiplicaron esponencialmente dende la pandemia.
Mientres la so comparecencia nel Parlamentu, Llamedo esplicó que s’incorporaron al anteproyectu delles novedaes importantes. Asina, les viviendes d’usu turísticu tendrán d’incluyir nes plataformes de comercialización el so númberu del Rexistru d’Empreses y Actividaes Turístiques d’Asturies, tanto si promocionen en soportes físicos como al traviés de canales dixitales.
Amás, esti tipu de pisos tendrán d’esibir nun llugar destacáu y visible una placa identificativa col so númberu d’inscripción nel citáu rexistru. Incumplir esta premisa va suponer incurrir nuna infracción grave. Esta midida va contribuyir a poner llende a los negocios illegales.
A finales de 2023, n’Asturies había rexistraes 5.696 viviendes pa turistes (2.016 vacacionales y 3.680 d’usu turísticu), según figura nel estudiu que ta ellaborando un equipu multidisciplinar de la Fundación Universidá d’Uviéu. Nel períodu de 2010 a 2019 incorporáronse una media de 250 nueves viviendes turístiques al añu, cifra que se disparó hasta les 605 dende 2020 hasta agora.
