El Gobiernu d’Asturies sorrayó nel estrenu de los nuevos trenes AVE’l notable ésitu de l’alta velocidá ferroviaria: dende l’apertura de la variante de Payares, el pasáu payares, Renfe vendió más de 500.000 billetes.
El conseyeru de Fomentu, Alejandro Calvo, anunció que’l Gobiernu asturianu trabaya en collaboración col Ministeriu de Tresportes y Renfe p’ameyorar la operativa actual con más servicios y frecuencies. L’oxetivu ye adaptar la ufierta y conectar de manera eficiente tol territoriu al traviés de distintos medios de tresporte públicu p’averar les ventayes de l’alta velocidá a los distintos conceyos.
El conseyeru informó que, una vegada remataes les obres de la estación madrilana de Chamartín, el Gobiernu d’Asturies espera la incorporación d’un nuevu serviciu low cost, el Avlo, y una frecuencia diaria d’Alvia dende Avilés. L’Executivu autonómicu tamién trabaya coles alministraciones competentes pa que’l primer AVE de la mañana incluya una parada en Mieres ensin qu’ello implique un crecimientu nel tiempu de viaxe escontra Madrid.
“Tamos viviendo un día históricu cola disponibilidá d’un serviciu AVE dende y escontra Asturies”, destacó Calvo, quien defendió la necesidá d’adaptar la operativa a les particularidaes d’Asturies. Pa Calvo, la parrilla tien de facilitar la interoperabilidad y sumar una parada en Mieres que faiga posible aprovechar el primer AVE de la mañana ensin penalizar la hora de llegada a Madrid, un oxetivu que s’espera algamar al curtiu plazu. Esti serviciu dexaría enllazar cola llanzadera d’alta velocidá del valle del Caudal y beneficiase d’otres meyores previstes nes siguientes fases.
«Esto va dexanos enllazar con tolos servicios que tamos implementando, incluyendo danzaderes n’otres localidaes d’Asturies. Vamos Priorizar les árees con mayor demanda al curtiu plazu, pero vamos trabayar por que, nel futuru, estos servicios lleguen a tolos rincones d’Asturies”, añedió’l titular de Fomentu.
