Xixón al día

Etiqueta: Teatru Xovellanos

  • Sara Baras amuesa la so «Alma» en Xixón

    Sara Baras amuesa la so «Alma» en Xixón

    Ye’l nuevu espectáculu de la bailladora, Sara Baras empecipia la so xira ‘Alma’ con un espectáculu dedicáu al boleru. Y ye ende precisamente onde anicia la esencia d’esta nueva creación: flamencu y boleru, al traviés de música de güei y de siempre. Asina ye’l nuevu espectáculu de Sara Baras, y asina ye la so vuelta a los escenarios con esta nueva producción. Seguiriya, soleá, caña, garrotín, bulería… toes elles acompañaes de voz y guitarra. Alma ye una creación distinta y singular, que percuerre soníos de siempre dende una perspectiva dafechu nueva.

    Les entraes tán a la vienta, con precios de 25€ a 40€, al traviés de www.teatrojovellanos.com, na taquilla del Teatru Xovellanos y de la Rede TickExpress de Liberbank.

  • La Compañía Asturiana de Comedias concede al Teatru Xovellanos el Premiu Honoríficu 2021

    La Compañía Asturiana de Comedias concede al Teatru Xovellanos el Premiu Honoríficu 2021

    La Compañía Asturiana de Comedies ta acabante de conceder al Teatru Xovellanos de Xixón el so Premiu Honoríficu del añu 2021, col cual quier reconocer al llabor de persones y entidaes na so defensa de la cultura asturiana y del teatru.

    Dende l’asociación consideren que la variada programación que presenta añalmente ye una de les pilastres fundamentales pa les polítiques de democratización cultural qu’esixe la sociedá xixonesa, pa consolidar el so talante abiertu y participativu. Y, dende’l puntu de vista de la cultura teatral asturiana, amás de la so programación habitual, destaquen el so apueste nos duros momentos del andanciu, pol teatru profesional producíu n’Asturies, que tolos amantes del teatru tenemos que curiar.
    Y, finalmente, estimen la mano tendida que’l patronatu de la entidá siempres ufiertó cada branu, dende l’enfotu d’unos programadores que siempres cuntaron gustosos cola so participación, pa ufiertar nes sos tables un alcuentru de gala ente’l teatru popular asturianu y el públicu de la llocalidá.

  • El Teatru Xovellanos pon güei a disposición del públicu la so nueva Tarxeta Regalu

    El Teatru Xovellanos pon güei a disposición del públicu la so nueva Tarxeta Regalu

    El Teatru Xovellanos pon güei llunes a disposición del públicu la so nueva Tarxeta Regalo. Con esta iniciativa pretende ufiertar una alternativa pa “regalar Cultura”, pa “regalar emociones” nestes feches navidiegues, previes al día de Reis. Les Tarxetes Regalu, por importe de 50 y de 100 euros, podrán adquirise en taquilla y on-line, nun van tener caducidá y podrán trocase dende’l mesmu momentu de la compra. La empresa municipal activa esta ufierta coincidiendo amás cola recién presentación de la so nueva temporada. Les entraes pa tola programación de xineru a marzu de 2022 yá tán a la vienta dende’l día 15 d’avientu ya inclúi grandes espectáculos de Teatru, y fantásticos conciertos.

    Procedimientu de compra:

    Pueden adquirise la Tarxeta Regalu del Teatru Xovellanos al traviés de la nuesa páxina web (www.teatrojovellanos.com) o nel horariu habitual de taquilla (de 12:00 a 14:00h y de 17:30 a 20:00h). Una vegada adquirida la Tarxeta Regalo Teatro Xovellanos, el comprador va recibir un númberu de referencia que va sirvir pa trocar l’importe por entraes a los nuesos espectáculos. Con esti númberu de referencia podrá mercase entraes tanto on-line, como na taquilla. Cuando s’utilice la Tarxeta Regalu dirá descontándose l’importe consumíu hasta qu’esti s’escose. En casu de que la compra supere’l valor de la Tarxeta Regalo o del saldu disponible, podrá abonase la diferencia.

  • El teatru Xovellanos amplía’l so aforu a 559 espectadores

    El teatru Xovellanos amplía’l so aforu a 559 espectadores

    El Teatru Xovellanos va ampliar el so aforu nos espectáculos programaos nel últimu trimestre del añu 2020. Hasta la fecha, dende l’apertura del coliséu nel mes de xunetu l’aforu amenorgárase a cien asistentes nel patiu de butaques. Dende ochobre va ampliase a 559 espectadores, distribuyíos en patiu de butaques, entesuelu y xeneral.

    La Conseyería de Salú del Principáu d’Asturies aprobó’l proyectu presentáu por Divertia, nel que se solicitaba dicha ampliación, n’apurriendo los informes y la documentación pertinentes. D’esta manera, el Teatru Xovellanos va poner a la vienta esta mesma selmana les localidaes pa los espectáculos d’ochobre, payares y avientu.

    Como deferencia, los habituales abonaos del Teatru van poder adquirir les entraes que deseyen hasta’l 17 de setiembre al nun haber abonos esti trimestre. El restu del públicu va poder adquiriles a partir del día 18. Les localidaes pa los conciertos/grabación del Proyectu Encaxa2 van salir a la venta’l día 18. Los puntos de vienta son: Taquilla del Teatru Xovellanos, de 12:00 h a 14:00 y de 17:30 a 20:00 hores, rede TickExpress de Liberbank y na web: www.teatrojovellanos.com.

    La programación del próximu trimestre, aprobada por unanimidá nel Conseyu d’Alministración de Divertia a finales d’agostu, inclúi grandes espectáculos del circuitu nacional y primer figures del Teatru y de la Danza, como: Blanca Portillo, Marta Carrasco, Pepón Nieto y Carmen Machi. El próximu trimestre’l Teatru Xovellanos tamién va acoyer el FICX, los espectáculos de referencia de Danza Xixón y el festival de Jazz Xixón, amás del proyectu Encaxa2, con: Tuya, Kaplan, Fee Reega, Ramón Prada y Rodrigo Cuevas. La programación va empezar el 2 ochobre con un platu fuerte: Mrs Dalloway, de Virginia Woolf, con Blanca Portillo.

  • ‘Intocables’ aporta al Teatru Xovellanos accesible pa tolos públicos

    ‘Intocables’ aporta al Teatru Xovellanos accesible pa tolos públicos

    ‘Intocables‘ aporta al Teatru Xovellanos. Les funciones, que van celebrase los díes 30 y 31 d’agostu a les 20:30, son accesibles y van tener sotituláu, audiodescripción, soníu amplificáu y bucle magnéticu. El proyeutu Teatru Accesible tien l’envís de crear una ufierta cultural abierta y accesible pa tolos públicos. Esti proyeutu ta promovíu por Fundación Vodafone España, el centru de rehabilitación llaboral Nueva Vida y la empresa teunolóxica Aptent Soluciones.

    Un aristócrata ricu tres un accidente queda tetrapléxicu y contrata como curiador a un xoven marxinal acabante de salir de la cárcel (n’otres pallabres, la persona menos indicada pal trabayu). Cansáu de curiadores que lu traten con piedá o condescendencia, lo que-y gusta d’él, al contrario, ye que nun-y tien compasión dala. Xuntos van a mecer a Vivaldi y la música rap, la fala elegante y la xíriga caleyera, los paxellos caros y los pantalones de chándal. Dos mundos que choquen pa terminar por entendese.

    Dambos dos van atopar nel otru non lo que deseen, sinon lo que precisen daveres. Al igual que los capítulos d’un llibru, les esperiencies que comparten creen una amistá indixebrable, pesie a les crítiques o la incomprensión de familiares y amigos. Devuelve-yos asina aquella pasión pola vida qu’escaecieren y la necesidá de compartila con daquién que sepa apreciala y aceptate colos tos defeutos y virtúes.

    Nel camín, dambos dos texen una rellación que va acuyá d’un alcuerdu llaboral, hasta convertise en collacios indixebrables. Una amistá tan improbable ya inesperada, como definitiva. Y de la oposición ente ún y otru, de la so convivencia escéntrica, xurde la comedia.

  • A la venta les entraes de los conciertos de Jazz Xixón

    A la venta les entraes de los conciertos de Jazz Xixón

    En payares les cadencies del jazz aporten a Xixón. Jazz Xixón esparde los soníos de grandes grupos y solistes d’esti estilu musical per dellos escenarios de la ciudá. Ye una oportunidá pa percibir el candor, la elegancia y la sensualidá d’esti xéneru musical. Esti miércoles salen a la venta les entraes de los conciertos que van celebrase nel Teatru Xovellanos y que, anguaño, axuntará a artistes de la talla de Camille Bertault, Chassol, Nils Petter Molvaer Group y Pepe Rivero Quinteto. A estos conciertos xúnese l’espectáculu familiar ‘El viaje de Emma (una historia de jazz alucinante)’, producíu por Teatro del Cuervo y cola collaboración de d’artistes del país de sonadía.

    Ta disponible un abonu pa los cuatro conciertos por namái 52 euros, lo que supón un 30% de descuentu sobre’l preciu d’entraes soles. Les entraes y l’abonu puen mercase nes taquilles y web del Teatru Xovellanos y nel serviciu de venta d’entraes de Liberbank.

    Camille Bertault
    Xueves, 7 de payares de 2019, a les 20:30h. Preciu: 18 euros

    Voz: Camille Bertault
    Pianu: Fady Farah

    Recuerden esti nome: Camille Bertault. La nueva sensación del siempres bullindiegu jazz francés tien, ensin dulda, una personalidá rezumante. Poro, el so discu caberu titúlase Pas de Géant, una referencia a ún de los músicos a quien versiona davezu nel so popular canal de Youtube: John Coltrane.

    Chassol
    Vienres, 8 de payares de 2019, a les 20:30h. Preciu: 18 euros

    Pianu & teclaos: Christophe Chassol
    Batería: Mathieu Edouard

    Pianista, compositor, iguador y direutor musical p’artistes como Phoenix o Sebastien Tellier, el carismáticu y talentosu Christophe Chassol crea unes pieces artístiques inclasificables. Les sos composiciones articulen voces, música, soníos ya imáxes y conviértenles n’oxetos visuales totalmente nuevos.

    Nils Petter Molvaer Group
    Sábadu, 9 de payares de 2019, a les 20:30h. Preciu: 20 euros

    Trompeta: Nils Petter Molvær
    Baxu: Jo Berger Myhre
    Bateria: Erland Dahlen

    D’ente les munches corrientes que suministren nueva vida al jazz, la que llega al traviés del recursu de la lletrónica ye una de les más puxantes. Son centenares les grabaciones que, dende’l norte d’Europa, alternen teunoloxía y jazz en delles proporciones. Trescurre’l tiempu y un nome sigue destacando perriba’l restu nesta fornada de músicos nuevos: ye’l trompetista noruegu Nils Petter Molvaer.

    Les composiciones de Molvaer, enllenes d’ecos esquisitos de Jon Hassell y Brian Eno, tamién inúndense de les invenciones rítmiques de Bill Laswell y la de los experimentos caberos materializaos por Miles Davis.

    El Viaje de Emma (una historia del Jazz alucinante)
    Domingu, 10 de payares de 2019, a les 12:00h. Preciu: 5 euros
    Voz: Mapi Quintana
    Saxu: Eladio Díaz
    Guitarra: Marco Martínez
    Contrabaxu: Alejandro San Pelayo
    Batería: Félix Morales

    Idega y direición musical: Marco Martínez
    Guión y direición: Sergio Gayol
    Produición: Teatro del Cuervo

    ‘El viaje de Emma’ ye una historia cola que se quier averar el jazz a los neños y neñes d’una manera prestosa y gayolera. Nesti viaxe, neños, neñes y mayores van conocer los principales estilos del jazz y a los músicos más importantes d’esti xéneru, amás d’escubrir los requexos d’esta música: ¿Cuál ye’l llabor de cada instrumentu?, ¿qué ye’l swing?, ¿cómo improvisen los músicos?…

    Pepe Rivero Quinteto / Yoruba Suite
    Domingu, 10 de payares de 2019, a les 20:30h. Preciu: 18 euros

    Pianu: Pepe Rivero
    Contrabaxu: Reinier Elizarde “El Negrón”
    Batería: Arnaldo Lescay
    Percusión & tambor bata: Yuvisney Aguilar
    Voz y percusión: Akinsola Elegbede

    El pianista y compositor Pepe Rivero forma parte d’una ‘Nueva Xeneración’ de músicos cubanos que remanecen na escena internacional del jazz. En acabando los sos estudios de pianu nel Instituto Superior de Arte de La Habana, onde recibió una formación clásica, la so vocación llevólu al jazz.

  • ‘Sidra en vena’, comedia astur-pop nel Xovellanos

    ‘Sidra en vena’, comedia astur-pop nel Xovellanos

    ‘Sidra en vena‘ llega a Xixón. La comedia va representase’l próximu vienres 12 de xunetu a les 20.30 hores nel Teatru Xovellanos. La familia Pomarada -dueño de Sidra Pumarada, el llagar más importante del oriente asturianu- decide celebrar la nueche de San Xuan na so casa de Ribeseya. El patriarca convida a los sos trés caprichosos fíos, que van venir dende Uviéu acompañaos d’homes, amigos y taxistes. Toos ellos van asistir col fin de vengase y asina cerrar el peor iviernu de les sos vides. Una nueche onde sangre y sidra van correr a partes iguales. Cachopos envelenaos, gaites rotes, orbayu constante y la Virxe de Cuadonga ausente.

    ‘Sidra en vena’ ye una comedia qu’entemez el vodevil coles series televisives, los xiros inesperaos coles infidelidaes, les pasiones, los barruntos y les vengaciones de dolce personaxes interpretaos por cinco actores. Ye ‘Dinastía‘, un ‘Falcon Crest’ del mundu de la sidra. ‘Sidra en vena’ ye fabada presentada n’una llata de Campbell’s. Ye una comedia ástur-pop.

    Escrita y empobinada por JuanMa Pina y producida por Montgomery Entertainment, ‘Sidra en vena’ ta protagonizada por Sergio Campoy, Mario Alberto Díez, Raquel Guerrero, Dolly (JuanFra Becerra) y Olga Hueso. La música ponla Rodrigo Cuevas. ‘Sidra en vena’ llega a Xixón depués d’un añu d’ésitu nel Teatru Lara de Madrid.

  • Xixón decreta trés díes de llutu pola muerte d’Arturo Fernández

    Xixón decreta trés díes de llutu pola muerte d’Arturo Fernández

    El Conceyu de Xixón decretó trés díes de llutu oficial na ciudá pol fallecimientu del actor y empresariu Arturo Fernández. Les banderes ondearán a mediu estil. El veloriu va instalase mañana vienres nel Teatru Xovellanos, a partir de les 15 hores. El funeral y entierru va ser el sábadu 6 de xunetu. El Plenu municipal va guardar un minutu de silenciu a les once d’esta mañana, primero qu’empiece la sesión estraordinaria prevista pa esti xueves.

    Arturo Fernández nació en Xixón en 1929, foi unu de los actores teatrales más relevantes de la hestoria recién d’España, collechando grandes ésitos coles sos comedies, llenes d’humor y elegancia, tantu nel teatru como na televisión. Otorgóse-y el títulu de Fíu Predilectu de la Villa de Xixón, la distinción más importante del Conceyu, en sesión plenaria con fecha 14 d’ochobre de 1994.

  • Lara Martínez, nueva xerente del Teatru Xovellanos

    Lara Martínez, nueva xerente del Teatru Xovellanos

    Lara Martínez va ser la nueva xerente del Teatru Xovellanos. La exedil socialista va ser la encargada de tomar les riendes de la sociedá una vegada se resuelva la reorganización de Divertia. Según informa Ser Xixón, Martínez ye l’apuesta del equipu de gobiernu que dirixe Ana González pa faese cargu de la xestión del Teatru Xovellanos y el Festival Internacional de Cine de Xixón (FICX). Estos dos organismos van pasar a depender directamente de la conceyalía de Cultura. Les demás competencies qu’hasta agora dependíen de Divertia van repartise ente delles conceyalíes. El Xardín Botánicu va tornar a Mediu Ambiente, mientres que Economía va asumir Turismu.

    Lara Martínez asocede nel cargu a Teresa Sánchez, responsable de la xestión del teatru Xovellanos mientres los ocho años de gobiernu de Foru Asturies. Martínez tien el títulu de profesora de pianu pol Conservatorio Profesional de Música de Xixón, foi presidenta de l’Asociación de Xestores Culturales d’Asturies y secretaria xeneral de la Federación Estatal que les axunta.

    Divertia creóse en 2014. Axunta les árees de Turismu, Festexos, Teatru Xovellanos, Festival Internacional de Cine y Xardín Botánicu. N’ella tan representaes, amás del Conceyu, la Cámara de Comerciu, entidaes culturales y empreses d’hostelería, hotelería, comerciu y actividaes turístiques.

  • Directu: debate de candidatos a l’Alcaldía de Xixón

    Directu: debate de candidatos a l’Alcaldía de Xixón

    La Federación d’Asociaciones de Vecinos (FAV) entama esti miércoles nel Teatru Xovellanos un debate ente los principales candidatos a l’Alcaldía de Xixón. Cualquier vecín de la ciudá puede plantegar una entruga al traviés de Facebook, Twitter o enviando un corréu llectrónicu a: gijonpregunta@gmail.com.