Un total de 101.575 estudiantes d’Infantil, Primaria, Secundaria (ESO) y Bachilleratu empecipiaron güei el cursu escolar que completa la implantación de la nueva llei educativa (LOMLOE). Esti cursu, el segundu col calendariu lectivu unificáu, estrena, amás, el plan de coeducación y el programa d’enseñanza en llingües estranxeres HaBLE.
El descensu global d’alumnáu estabilizar nel 1%. La matrícula de Secundaria y Bachilleratu xube a 43.771 estudiantes, lo que supón una medría de 984 respectu al cursu anterior (un 2,2%). Na rede pública rexistráronse 33.322 matriculaciones, mientres que les 10.449 restantes correspuenden a la privada alcordada.
Xixón ye’l conceyu con más estudiantes nestes etapes (12.315), siguíu por Uviéu (10.274), Avilés (3.993), la contorna del Nalón (2.919) y la contorna del Caudal (2.166).
Les etapes d’Infantil y Primaria sumen 57.804 estudiantes. En númberos absolutos, son 2.075 menos que’l cursu pasáu, lo que supón un descensu del 3,5%. Na rede pública contabilícense 41.133 matrícules y les 16.671 restantes, nos colexos alcordaos.
Xixón tamién ye’l conceyu con más estudiantes n’Infantil y Primaria, con 15.280; siguíu d’Uviéu, con 13.716; Avilés, con 5.079; la contorna del Nalón, con 3.658, y la contorna del Caudal, con 2.905.
Per otru llau, la perda d’unidaes ye proporcionalmente inferior a la de matrícula. En concretu, los 2.075 estudiantes menos n’Infantil y Primaria solo supunxeron la supresión de 23 y 2 clases, respectivamente, según los últimos datos disponibles. Coles mesmes, la medría de 984 estudiantes nESO y Bachilleratu trai l’apertura de 16 nueves unidaes.
Tocantes a la dotación de personal para la rede pública, la plantiya orgánica xube a 9.525 docentes, lo que supon una medría de 71 places en relación col cursu pasáu.
Per otra parte, Asturies ye la sesta comunidá con mayor gastu por estudiante. L’últimu datu oficial –correspondiente a 2020- asitia la inversión en 7.702 euros per alumnu públicu, un 4,3% más qu’en 2019.
