El Gobiernu d’Asturies aprobó güei un gastu de 1.476.477 euros pa sofitar iniciatives que fomenten la creación d’empléu, el relevu xeneracional y la innovación nel sector pesqueru. Esta partida, cofinanciada pol Fondu Européu Marítimu y de la Pesca (FEMP), estrémase en dos llínees d’ayudes: una destinada a entidaes locales, dotada con 942.100 euros, y otra pa organizaciones ensin ánimu d’arriquecimientu, con un presupuestu de 534.377 euros.
Les cantidaes presupuestaes pa les dos convocatories d’anguaño aumenten notablemente en comparanza con 2021, concretamente un 532% la d’entidaes locales (793.137 euros más) y un 136% la d’organizaciones ensin ánimu d’arriquecimientu (307.733 euros más).
L’executivu aprobó un gastu de 1.535.652 euros pa sovencionar acciones de formación de la población activa en nueves competencies y habilidaes en sectores estratéxicos, curiáu de les persones y zones en riesgu de despoblación. Les ayudes, financiaes con fondos del Plan de Recuperación, Tresformamientu y Resiliencia, van dirixíes a empreses, asociaciones empresariales y entidaes ensin ánimu d’arriquecimientu. Esta midida pretende facilitar la formación en competencies emerxentes y en sectores llamaos a crear nuevos puestos de trabayu nel futuru, como’l cuidu de les persones o la transición ecolóxica.
