El plan especial de tresporte a los llagos de Cuadonga, impulsáu pol Gobiernu d’Asturies, va empezar a funcionar el próximu sábadu, 5 d’abril. El dispositivu de tresporte públicu, que va ufiertar 3.000 places diaries con diez servicios de xubida y otros tantos de baxada, va tar operativu 184 díes anguaño, dos más qu’en 2024. Coles mesmes, el gobiernnu va activar tamién el serviciu especial de tresporte ente Arenas de Cabrales, Poncebos, Tielve y Sotres ente’l 12 y 20 d’abril, coincidiendo cola Selmana Santa.
Dambes iniciatives enmárquense dientro del apueste del Executivu pa facilitar una movilidá más sostenible dientro de los espacios naturales protexíos. L’añu pasáu, más de 325.000 usuarios utilizaron dalgún de los servicios habilitaos pa visitar les reserves de la biosfera y los espacios naturales costeros.
Nel casu del plan d’accesu a los llagos de Cuadonga, el Consorciu de Tresportes d’Asturies (CTA) va ufiertar, amás, un serviciu de danzadera pa facilitar la conexón y amenorgar el tráficu entre Cangues d’Onís y el Real Sitiu. Un total de 217.471 persones utilizaron en 2024 el dispositivu de tresporte púbicu p’aportar al espaciu natural protexíu.
Los billetes pa xubir a los llagos yá tán a la vienta, de forma antemanada, na plataforma http://www.buslagoscovadonga.es/. D’esta forma, el Gobiernu d’Asturies fomenta l’alquisición previa de los tiques pa que l’operativu funcione de forma más ordenada, amenorgar les aglomeraciones y les coles y ameyorar la esperiencia del visitante. L’añu pasáu, el 65% de los viaxeros mercaron los sos billetes con antelación.
Salíes y horarios
La salida de los autobuses escontra l’espaciu natural va realizar en cada franxa horaria dende trés puntos: Cangues d’Onís, El Monte y Muñíu, con paraes n’El Repelao y Cuadonga. Les persones usuaries tendrán d’adquirir los billetes d’ida y vuelta antes d’aportar al autobús de forma telemática, en taquilla o nos puntos de venta o axencies de viaxe habilitaes.
El primer serviciu de la mañana va salir pa los llagos a les 8:00 y el postreru, a les 17:45 hores. En sentíu inversu, el primeru va baxar a les 11:05 y el postreru, a les 20:50 hores. Estos horarios van caltenese vixentes mientres la temporada alta, que va rematar a finales de setiembre, y van afaese a partir de la ponte del 12 d’ochobre.
El Gobiernu d’Asturies caltien amás el serviciu llanzadera cada media hora pa facilitar la conexón entre Cangues d’Onís y el Real Sitiu. El dispositivu va cuntar con 26 frecuencies diaries y una salida cada 30 minutos en dambos sentíos, ente les 7:40 y les 20:00 hores nel casu de los servicios que parten de la capital del conceyu. El so usu ta incluyíu nel billete del plan de llagos, mientres que’l restu de persones usuaries van poder viaxar cola tarxeta CONECTA o per aciu la compra d’un billete cenciellu.
